Бир авлод сигарета чекмайди: 2015 йилдан кейин туғилганларга умрбод тамаки тақиқи таклиф қилинмоқда
Шунингдек, 2040 йилдан бошлаб тамаки маҳсулотларини ишлаб чиқариш ва сотишни тўлиқ тўхтатиш режалаштирилмоқда.
Туркияда тамаки маҳсулотларини истеъмол қилишни камайтиришга қаратилган янги қонун лойиҳаси тайёрланмоқда. Ҳужжатда 2015 йил 1 январдан кейин туғилган шахсларнинг бутун умри давомида тамаки маҳсулотларини сотиб олиши ва истеъмол қилишини тақиқлаш таклиф этилмоқда.
Анадолу агентлиги хабарига кўра, Соғлиқни сақлаш вазирлиги қарийб бир йилдан бери ишлаб чиқаётган қонун лойиҳасини октябрь ойида Туркия парламентига тақдим этиш режалаштирилган. Ҳужжат ҳали лойиҳа босқичида бўлиб, унинг якуний бандлари парламент муҳокамаси давомида ўзгариши мумкин.
Таклифлардан бирига кўра, 2015 йил 1 январдан кейин туғилганлар келгусида тамаки маҳсулотларини нафақат истеъмол қила олмайди, балки уларни сотиб олиш ҳам тақиқланади. Бу орқали тамаки истеъмолига жалб қилинмайдиган янги авлодни шакллантириш мақсад қилинган.
Лойиҳада тамаки маҳсулотларини ишлаб чиқариш ва сотишга оид узоқ муддатли чеклов ҳам бор. Унга кўра, 2040 йилдан бошлаб мамлакатда тамаки маҳсулотларини ишлаб чиқариш ва сотишни тўлиқ тўхтатиш таклиф этилмоқда.
Шунингдек, ресторанларнинг ёпиқ ва очиқ қисмларида чекишни тақиқлаш, парклар, боғлар ҳамда давлат бинолари ҳудудларида эса ташқаридан кўринмайдиган махсус чекиш жойларини ташкил этиш таклиф қилинмоқда. Мақсад болалар ва ёшларнинг жамоат жойларида чекишни кўришини камайтириш экани айтилган.
Қонун лойиҳасида сигареталар қадоқларини стандартлаштириш, «слим» деб аталадиган ингичка сигаретларни муомаладан чиқариш ҳамда вояга етмаганларга тамаки маҳсулотлари сотилишини назорат қилишни кучайтириш каби чоралар ҳам кўриб чиқилмоқда.
Янги чекловлар Туркияда тамаки истеъмоли юқори даражада қолаётган бир пайтда таклиф қилинмоқда. Анадолу агентлиги маълумотларига кўра, 2025 йилда мамлакатда 15 ёш ва ундан катта аҳолининг 33,2 фоизи тамаки маҳсулотларидан фойдаланган. Эркакларда бу кўрсаткич 46 фоиз, аёлларда эса 20,6 фоизни ташкил этган.
Шунингдек, мамлакатда сигарет савдоси 2012 йилдаги қарийб 91 минг тонна ва 4,5 миллиард қутидан 2025 йилда 160 минг тонна ва 8 миллиард қутигача ошгани қайд этилган.
Ҳозирча мазкур чоралар қонун сифатида қабул қилинмаган. Якуний қоидалар, уларнинг кучга кириш муддати ва ижро механизмлари қонун лойиҳаси парламентга киритилиб, муҳокама қилинганидан сўнг аниқланади.
