Каспийдаги машғулотларда ҳарбийлар қутқарув нимчаларисиз қолган — Тўқаев
Қозоғистон президенти фожиа сабабларини ва хавфсизлик чораларига риоя этилишини текширишни топширди.
Қосим-Жомарт Тўқаев Каспий денгизидаги ҳарбий машғулотлар вақтида ҳарбий хизматчилар зарур жиҳозлар, жумладан, денгиз қутқарув нимчалари билан таъминланмаганини маълум қилди.
Бу ҳақда у 27 сентябрь куни Мудофаа вазирлиги раҳбарияти билан ўтказган йиғилишда айтган. Президент матбуот хизматига кўра, Тўқаев ҳарбий хизматчиларнинг хавфсизлиги билан боғлиқ талаблар бажарилмаганига алоҳида эътибор қаратган.
Тўқаев ҳукумат комиссиясига машғулотларни тайёрлаш ва ўтказиш, ҳарбийларни зарур воситалар билан таъминлаш ҳамда хавфсизлик чораларига риоя этилиши учун масъул мансабдорларнинг ҳаракатларини текширишни топширган.
Президент, шунингдек, машғулотлар режасини ким ишлаб чиққани ва тасдиқлагани, Бош штаб томонидан ишлар қандай мувофиқлаштирилгани ҳамда Ҳарбий-денгиз кучлари бош қўмондони нима сабабдан машғулотларда бўлмагани юзасидан текширув ўтказишни талаб қилган.
Тўқаев ҳарбий хизматчиларнинг тинчлик даврида ҳалок бўлишини офицерлар, жумладан, генераллар томонидан йўл қўйилган, унинг таърифича, “жиноий характердаги нопрофессионаллик” билан боғлаган. У армиядаги тизимли муаммоларни бартараф этиш ва ҳарбий соҳада ислоҳотлар ўтказиш зарурлигини таъкидлаган.
Фожиа 24 сентябрь куни Манғистов вилоятида Каспий денгизидаги “Хазар қорағони — 2026” ҳарбий машғулотлари вақтида юз берган эди. Ҳарбий хизматчиларни «Қайсар» катеридан тушириш вақтида об-ҳавонинг кескин ёмонлашуви ва кучли шамол оқибатида 17 нафар ҳарбий денгизга олиб кетилган. Улардан 3 нафари қутқарилган, 14 нафари ҳалок бўлган.
Ҳодиса юзасидан жиноий иш қўзғатилган. Расмий маълумотларга кўра, иш хизматга бепарво муносабат ва кемани бошқариш қоидаларини бузиш билан боғлиқ моддалар асосида юритилмоқда. Шунингдек, Мудофаа вазирлигининг бир қатор мансабдор шахслари, жумладан, юқори ва катта қўмондонлик таркибига кирувчи ходимлар ҳибсга олинган.
27 сентябрь куни Тўқаев Мудофаа вазири Даурен Косановни лавозимидан озод қилиб, ҳарбий идора раҳбари этиб Айдўс Мирсахметовни тайинлаган.
