Ўзбекистон Сурияни йирик ҳисобда мағлуб этди
Ўзбекистон терма жамоаси навбатдаги учрашувини Жанубий Кореяга қарши ўтказади.
Ўзбекистон миллий терма жамоаси Тошкентда Сурияга қарши ўртоқлик учрашувида майдонга тушди.
«Пахтакор» стадионида ўтган баҳсда Фабио Каннаваро шогирдлари 4:1 ҳисобида ғалаба қозонди. Учрашувнинг 28-дақиқасида Шерзод Эсанов ҳисобни очди. Биринчи бўлим якунланишига бир дақиқа қолганида Акмал Мозговой Ўзбекистоннинг иккинчи голини урди.
Иккинчи бўлим бошида Ҳусайн Норчаев ҳисобни 3:0 кўринишига келтирди. Ҳужумчи 90-дақиқада яна бир бор гол уриб, дублини расмийлаштирди.
Суриянинг ягона голи эса учрашув якунида Ўзбекистон футболчиси Муҳаммад Ҳакимовнинг автоголи натижасида қайд этилди.
Ўзбекистон — Сурия 4:1
Голлар: Эсанов 28, Мозговой 44, Норчаев 48, 90 — Ҳакимов 90+3 (автогол).
Маълумот учун, Ўзбекистон терма жамоаси навбатдаги учрашувини 6 октябрь куни меҳмонда Жанубий Кореяга қарши ўтказади.
