“Учинчиси йўқ”: Алиев АҚШ ва Хитойни дунёнинг икки суперкучи деб атади
Унинг таъкидлашича, Боку ҳар икки давлат билан стратегик шериклик алоқаларини ўрнатган.
Озарбайжон президенти Илҳом Алиев АҚШ ва Хитойни дунёдаги икки суперкуч деб атади. У мамлакат ҳар икки давлат билан стратегик шериклик алоқаларини ўрнатганини таъкидлади.
Алиев бу ҳақда Бокуда бўлиб ўтган Янги Озарбайжон партиясининг VIII қурилтойида сўзлаган нутқида маълум қилган.
«Хитой ва Америка билан стратегик шериклик муносабатларини ўрнатдик. Хитой билан ҳар томонлама стратегик шериклик тўғрисидаги декларация, АҚШ билан эса Стратегик хартия имзоланди. Булар дунёнинг икки суперкучи, учинчиси йўқ», — деган Алиев.
Унинг сўзларига кўра, АҚШ ва Хитой ўртасида рақобат мавжуд бўлса-да, бу икки давлатнинг ўзаро тушуниш асосида глобал қоидаларни белгилаши бутун дунё учун муҳим омил бўлиши мумкин.
Алиев Озарбайжоннинг ҳар икки давлат билан стратегик шерик эканини қайд этиб, буни мамлакатга бўлган ишонч билан изоҳлаган.
Шунингдек, президент Озарбайжон ҳеч қайси сиёсий лагерга қўшилмаслигини таъкидлаган. Унинг айтишича, мамлакат мустақил сиёсат юритиб, миллий манфаатларини ҳимоя қилишда давом этади.
Маълумот учун, Озарбайжон ва Хитой 2025 йил апрелида кенг қамровли стратегик шерикликни ўрнатиш тўғрисидаги қўшма декларацияни имзолаган. Алиевнинг 2 октябрдаги нутқида АҚШ билан ҳам Стратегик хартия имзолангани қайд этилган.
