Жуда кўп миқдордаги фирибгарлик: гумонланувчи Грузияда қўлга олинди

Интерпол каналлари орқали олиб борилган ҳамкорлик натижасида Ўзбекистонда Жиноят кодексининг 168-моддаси 4-қисмида назарда тутилган жиноятни содир этганликда гумон қилиниб, халқаро қидирувга берилган фуқаро Грузиядан Ўзбекистонга экстрадиция қилинди.

 

Қайд этилишича, тезкор-қидирув тадбирлари давомида қидирувдаги шахснинг Грузия ҳудудида экани аниқланган. Шундан сўнг Ўзбекистон ва Грузия Интерпол Миллий марказий бюролари ўртасидаги ҳамкорлик доирасида уни ушлаш ва Ўзбекистонга қайтариш бўйича зарур чоралар кўрилган.

 

Грузиянинг ваколатли органлари қидирувдаги шахсни қўлга олган. Кейинчалик Ўзбекистон Республикаси Бош прокуратурасининг экстрадиция тўғрисидаги илтимосномаси қаноатлантирилган. Қонунчиликда белгиланган тартиб-таомиллар якунлангач, шахсни Ўзбекистон томонига топшириш тўғрисида қарор қабул қилинган.

 

Интерпол Миллий марказий бюролари ходимлари иштирокида фуқаро Грузиядан Ўзбекистонга олиб келинган. Ҳозирда унга нисбатан қонунчиликка мувофиқ кейинги процессуал ҳаракатлар амалга оширилмоқда.

 

Интерполнинг Ўзбекистондаги Миллий марказий бюроси хорижий давлатларнинг ҳуқуқни муҳофаза қилувчи органлари билан ҳамкорликни кучайтириш, халқаро қидирувда бўлган шахсларни аниқлаш, ушлаш ва экстрадиция қилиш бўйича ишларни давом эттираётганини маълум қилди.