Талончи солиқчилар: Қаршида инспекторлар 122,6 млн сўмни ўзлаштирди
Улар пулни солиқ қарздорлигини сўндириш мақсадида олиб, кейинчалик ўзлаштириш ёки растрата йўли билан талон-торож қилганликлари аниқланган.
Қашқадарё вилоятида солиқ тўловчиларнинг пулларини талон-торож қилган солиқчилар фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.
Қайд этилишича, ўтказилган терговга қадар текширувда Қарши шаҳар солиқ инспекцияси давлат солиқ бош инспекторлари М.А., Ш.Т. ва бошқалар 97 нафар солиқ тўловчидан 122,6 млн сўмни гўёки солиқ қарздорлигини сўндириш мақсадида олиб, ушбу пулларни солиқ тўловчиларнинг шахсий ҳисобварағига кирим қилмасдан, ўзлаштириш ёки растрата йўли билан талон-торож қилганликлари аниқланган.
Ҳозирда мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари олиб борилмоқда.
Аввалроқ Зангиота туманида солиқ инспекцияси бош инспектори пулни кирим қилмасдан шахсий банк пластик картасига ўтказиб олган тадбиркорни жаримага тортмаслик эвазига 1000 доллар пора талаб қилгани фош этилганди.
