Россияда ўлат хавфи: АҚШ фуқароларига мамлакатни зудлик билан тарк этишга чақирди

 

АҚШнинг Россиядаги элчихонаси Иркутск вилоятида пневмоник ўлат хавфи юзага келгани ҳақидаги хабарлар ортидан мамлакатдаги америкаликлар учун соғлиқ бўйича огоҳлантириш эълон қилди.

 

Дипломатик миссия Иркутск вилоятида бир кишининг ўлими, пневмоник ўлат эҳтимоли ва карантин чоралари жорий этилгани ҳақидаги хабарларни кузатиб бораётганини маълум қилди.

 

АҚШ Давлат департаменти Россия ҳудудида бўлган фуқароларига мамлакатни зудлик билан тарк этишни тавсия қилди. Россияга сафар қилишни режалаштираётган америкаликларга эса мамлакатга бормаслик тавсия этилди.

 

Элчихона, шунингдек, АҚШ ҳукуматининг Россиядаги, айниқса Москва ташқарисидаги фуқароларга фавқулодда вазиятларда ёрдам кўрсатиш имкониятлари чекланганини қайд этган.

 

Россияда бўлган америкаликларга маҳаллий соғлиқни сақлаш органлари кўрсатмаларига амал қилиш, имкон қадар чекланган тиббий муассасаларга бормаслик ҳамда иситма ёки нафас олиш билан боғлиқ аломатлар пайдо бўлса, дарҳол тиббий ёрдамга мурожаат қилиш тавсия қилинган.

 

Эпидемия эҳтимоли мавжуд ҳудудларда бўлган фуқароларга эса сафардан кейинги 14 кун давомида соғлиғини кузатиб бориш ва фавқулодда вазият юзага келганда АҚШ ҳукуматининг ёрдамига таянмайдиган чиқиш режасини олдиндан тайёрлаш тавсия этилган.

 

Аввалроқ Россиянинг Иркутск вилоятида ўлат билан боғлиқ хавф юзага келгани ҳақида хабар берилган эди. Хабарларга кўра, Шелеховский туманида ўта хавфли инфекцияга гумон қилинган ҳолат қайд этилган. Кейинчалик ҳудуддаги мутасаддилар вазият назорат остида эканини билдирган.

 

АҚШ расмийлари Россия томонини аниқланган инфекция бўйича халқаро ҳамжамиятга кўпроқ маълумот тақдим этишга чақирган.