Пискент ҳокими фермерларга босим ўтказгани айтилмоқда: прокуратурага мурожаат қилинди
Фермерлар кенгаши ҳоким фермерларга босим ўтказгани ҳақидаги хабарлар ортидан мурожаат йўллаган.
Ўзбекистон фермерлари кенгаши Тошкент вилояти Пискент тумани ҳокими Музаффар Ариповнинг фермерларга босим ўтказгани ҳақидаги хабарлар юзасидан прокуратура органларига мурожаат қилди. Бу ҳақда «Фермер минбари» Теlegram-канали хабар берди.
Кенгаш 2026 йил 9 октябрь куни йўллаган мурожаатида ҳокимнинг хатти-ҳаракатларига ҳуқуқий баҳо берилишида амалий ёрдам сўраган.
Аввалроқ Пискент тумани ҳокими фермерларни ҳақорат қилгани ва картошка экилмаса, ерларини олиб қўйиш билан таҳдид қилгани ҳақида хабарлар тарқалганди.
Фермерлар кенгаши муносабатида Ўзбекистон Республикаси Конституциясининг 26-моддаси эслатилиб, инсоннинг шаъни ва қадр-қиммати дахлсизлиги таъкидланган. Шунингдек, Маъмурий жавобгарлик тўғрисидаги кодекснинг 41-моддасига кўра, ҳақорат қилиш учун базавий ҳисоблаш миқдорининг 20 бараваридан 40 бараваригача жарима белгиланиши қайд этилган.
Ҳокимлик 9 октябрь куни ҳолат юзасидан изоҳ бериб, фермерлар билан йиғилиш картошка экиш бўйича белгиланган режалар бажарилмагани сабабли ўтказилганини билдирган.
Ҳокимлик маълумотига кўра, туманда ғалладан бўшаган қарийб минг гектар ерда такрорий экин сифатида кечки картошка етиштириш режалаштирилган. Бироқ айрим фермерлар белгиланган режа асосида картошка экмаган, ер майдонларини эса бошқа шахсларга сотиб юборган.
Ҳокимлик ер фермернинг хусусий мулки эмаслигини, ундан фойдаланиш қонунчиликда белгиланган тартибда амалга оширилишини таъкидлаган. Шу билан бирга, ҳокимлик белгиланган вазифаларнинг долзарблиги йиғилишдаги ҳар қандай муомала шаклини оқламаслигини билдирган. Фермерларнинг ҳуқуқлари ва аҳоли манфаатлари ҳурмат қилиниши, йиғилишдаги муомала ҳамда телефонлар олиб қўйилгани ҳақидаги даъволар холис ўрганилиши лозимлиги қайд этилган.
