680 минг сўм сақлаб қолинади: банкларнинг кредит пулини автоматик ечишига чеклов қўйилади
Банклар барча карталардаги жами қолдиқ меҳнатга ҳақ тўлашнинг энг кам миқдорининг ярмидан камайиб кетишига йўл қўймаслиги керак.
Ўзбекистонда 2027 йил 10 январдан тижорат банклари мижозларнинг кредит ва кафиллик тўловларини уларнинг алоҳида топшириғисиз автоматик ечиб олганда, банк карталарида жами камида 680 минг сўм қолдириши керак бўлади. Бу ҳақда Марказий банк бошқарувининг қарорида белгиланган.
Ҳужжат билан банк хизматлари истеъмолчилари билан муносабатларда тижорат банклари фаолиятига қўйиладиган минимал талаблар тўғрисидаги низомга қўшимча киритилмоқда.
Янги талабга кўра, банк мижоз билан тузилган шартнома асосида кредит ёки кафиллик тўловларини унинг алоҳида топшириғисиз ундирганида, мижознинг барча банк карта ҳисобварақларида меҳнатга ҳақ тўлашнинг энг кам миқдорининг ярмига тенг маблағ сақланиб қолиши лозим.
Ҳозирда ушбу миқдор 680 минг сўмни ташкил этади. Демак, автоматик ундиришдан кейин мижознинг барча банк карталаридаги жами қолдиқ белгиланган чегарадан камаймаслиги керак.
Чеклов фақат кредит ва кафиллик тўловларини мижознинг алоҳида топшириғисиз автоматик ечиб олиш операцияларига тааллуқли.
Қарор расмий эълон қилинган кундан уч ой ўтгач — 2027 йил 10 январдан кучга киради.
