Метро пандуслари нега ишламаяпти? Метрополитен изоҳ берди

Тошкент метрополитени бекатларининг кириш-чиқиш қисмларида ўрнатилаётган электрон кўтаргич пандуслар фаолиятидаги камчиликлар ва улардан фойдаланишда юзага келаётган ноқулайликлар юзасидан расмий изоҳ берди.

Метрополитен маълумотига кўра, сўнгги йилларда йўловчилар сони ортиб бораётгани сабабли, хусусан, ҳаракатланиш имконияти чекланган шахслар ва кекса ёшдаги фуқаролар учун қулай ҳамда хавфсиз муҳит яратишга эътибор қаратилмоқда. Шу мақсадда Вазирлар Маҳкамасининг тегишли қарорига мувофиқ, метро бекатларида замонавий электрон кўтаргич пандуслар ўрнатилмоқда.

Лойиҳа Тошкент шаҳар ҳокимлигининг “Ягона буюртмачи хизмати” инжиниринг компанияси буюртмаси асосида амалга оширилмоқда. Қурилиш-монтаж ишларини эса «Технопарк» МЧЖ олиб бормоқда.

Айни пайтда пандусларни ўрнатиш, созлаш ва синовдан ўтказиш ишлари давом этмоқда. Шу сабабли айрим қурилмалар ҳали тўлиқ ишга туширилмаган. Метрополитен юзага келаётган ноқулайликларни қурилиш-монтаж ва созлаш ишлари якунланмагани билан изоҳлаган.

Қайд этилишича, “Тошкент метрополитени” АЖ масъул ташкилотларга ишларни жадаллаштириш, мавжуд камчиликларни бартараф этиш ва қурилмаларни фойдаланишга тайёрлаш бўйича бир неча бор расмий мурожаат юборган.

Шунингдек, электрон пандуслар ҳозирча метрополитен балансига қабул қилинмаган. Барча қурилиш-монтаж ишлари якунланиб, зарур синовлар ўтказилгач ва қурилмаларнинг техник талабларга мувофиқлиги тасдиқлангач, улар белгиланган тартибда метрополитен тасарруфига ўтказилиши режалаштирилган.

Йўловчилар хавфсизлигини таъминлаш ва қурилмалардан тўғри фойдаланиш учун ҳар бир электрон пандус ёнида фойдаланиш тартиби бўйича йўриқномалар ҳамда тегишли маълумотлар жойлаштирилмоқда.

Метрополитен йўловчилар, жумладан, ҳаракатланиш имконияти чекланган фуқаролар учун қулай ва хавфсиз шароит яратиш ишлари давом эттирилишини билдирган.