“Трамп океани”: АҚШ президенти янги таклиф билан чиқди
АҚШ президенти океанлардан бирининг номини ўзгартиришни таклиф қилди.
Дональд Трамп мамлакатдаги сув ҳавзалари номларини ўзгартириш масаласини яна кўтарди. У Теннесси штатидаги митингда Атлантика ёки Тинч океанига янги ном бериш имкониятини тилга олди. Бу ҳақда The Washington Post хабар берди.
“Бизда қўлтиқ бор. Бизда гўзал кўл бор. Энди кимдир бизга дарё кераклигини айтди. Бизга дарё керак. Бизга океан керак”, — деган Трамп.
У океанлардан бирини “Трамп океани” ёки “Америка океани” деб аташни таклиф қилди. Президентнинг сўзларига кўра, ваколат муддати тугашидан олдин АҚШ ўз номи билан аталадиган океанга ҳам эга бўлиши керак.
The Washington Post қайд этишича, Трамп сув ҳавзалари ва бошқа географик объектлар номларини ўзгартиришда ўзининг ижро этувчи ваколатларидан фойдаланиши мумкин. Бироқ хусусий онлайн хариталаш хизматлари янги номларни қўллаш-қўлламасликни ўзлари ҳал қилади.
Трамп аввал ҳам АҚШдаги географик объектлар номларини ўзгартириш ташаббусларини илгари сурган. 2025-йил январь ойида у Мексика қўлтиғини “Америка қўлтиғи”, Аляскадаги Денали тоғини эса “Мак-Кинли тоғи” деб қайта номлашни буюрган эди.
2026-йил август ойида эса президент Онтарио кўлини “Америка кўли” деб аташ тўғрисидаги фармонни имзолаган.
