Яндексдаги носозликлар: ускуналарни тиклаш ярим йилгача вақт олади
Яндекс маълумотлар марказларига қилинган дронлар ҳужумидан кейин айрим хизматларда узилишлар кузатилди.
Россиянинг «Коммерсант» нашри IT бозори вакилларига таяниб хабар беришича, Яндекснинг Владимир вилоятидаги маълумотлар марказларида шикастланган ускуналарни алмаштириш учун зарур жиҳозларни етказиб бериш олти ойгача вақт олиши мумкин.
Нашр манбаларининг фикрича, компания зарарни тезроқ қоплаш учун турли каналлар, жумладан, хорижий етказиб берувчилар орқали ускуналар харид қилишга мажбур бўлиши мумкин. Бу эса бозорда аппарат воситалари нархининг қисқа муддатли ошишига олиб келиши эҳтимоли бор.
Strategy Partners вакили Сергей Кудряшовнинг таъкидлашича, сўнгги йилларда ҳисоблаш қувватларига, айниқса, сунъий интеллект учун мўлжалланган тезлаткичларга талаб ошиб, уларнинг нархи ҳам кўтарилган. Шу сабабли ускуналарни харид қилиш қиммат ва узоқ давом этадиган жараёнга айланиши мумкин.
Нашр суҳбатдошларининг фикрича, қўшимча харажатлар келгусида мижозлар учун булутли хизматлар нархининг ошишига ҳам олиб келиши мумкин.
Маълумотларга кўра, 10 октябрдан 11 октябрга ўтар кечаси Яндекснинг Владимир вилоятидаги маълумотлар марказига дронлар ҳужуми оқибатида инфратузилма шикастланган ва марказ фаолияти тўхтатилган. Сўнгги кунларда компаниянинг бир нечта маълумотлар марказлари ҳужумларга учрагани ҳақида хабарлар тарқалди.
Бунинг ортидан Яндекс хизматларида, жумладан, такси ва бошқа рақамли платформаларда узилишлар кузатилди. Муаммолар Россиядан ташқари Қозоғистон, Қирғизистон ва Ўзбекистондаги фойдаланувчиларга ҳам таъсир қилгани хабар қилинган.
Қозоғистоннинг Сунъий интеллект ва рақамли ривожланиш вазирлиги фойдаланувчиларнинг шахсий маълумотларини сақлаш учун фойдаланиладиган мамлакат ичидаги серверлар нормал ишлаётганини маълум қилган. Бироқ такси ва етказиб бериш хизматларининг ишлаши учун зарур айрим компонентлар Қозоғистондан ташқарида жойлашган.
Вазирлик Яндекс ҳамда мамлакатдаги инфратузилма ташкилотлари билан ҳамкорликда муаммоларни ҳал қилиш чораларини кўраётганини билдирган.
Шунингдек, Яндекс бошқа хизматлар фаолиятини сақлаб қолиш мақсадида Яндекс Диск булутли хотирасидан файлларни юклаб олиш имкониятини чеклагани ҳақида ҳам хабар берилган.
