Дунё паспортлари рейтинги янгиланди: Ўзбекистон нечанчи ўринда?
Ўзбекистон паспорти халқаро рейтингда 9 поғонага пасайди.
Ўзбекистон Henley & Partners халқаро консалтинг компанияси тузадиган дунё паспортлари рейтингида 106 та давлат орасида 82-ўринни эгаллади.
Жорий йилнинг апрель ойида Ўзбекистон ушбу рейтингда 73-ўринда қайд этилган эди. Шундай қилиб, мамлакатнинг рейтингдаги ўрни тўққиз поғонага пасайган. 2025 йил якунларига кўра эса Ўзбекистон 79-ўринда бўлган.
Рейтингнинг жорий натижаларига кўра, Ўзбекистон Буркина-Фасо ва Того билан бир хил — 82-ўринни эгаллаган. Ўзбекистон фуқаролари 57 та давлатга визасиз ёки борилган мамлакатда виза расмийлаштириш орқали кириши мумкин.
Рейтингда Cингапур биринчи ўринни эгаллаб турибди. Унинг фуқаролари 193 та давлат ва ҳудудга визасиз сафар қилиш имкониятига эга. Афғонистон эса паспорт эгалари 22 та давлатга визасиз бориши мумкин бўлган ҳолда рейтингнинг охирги поғонасида қайд этилган.
Henley Passport Index мамлакатлар паспортларининг халқаро сафарлар учун берадиган имкониятларини, жумладан, визасиз кириш мумкин бўлган йўналишлар сонини ҳисобга олган ҳолда тузилади.
