Тадбиркорга фахрий унвон, китобхон оилаларга уй: Қашқадарёдаги йиғилишда нималар айтилди?

Президент Шавкат Мирзиёев Қашқадарё вилоятини ижтимоий-иқтисодий ривожлантириш масалаларига бағишланган йиғилиш ўтказмоқда.

Давлат раҳбари ҳосил йиғим-терими қизғин кечаётган кунларда қашқадарёликлар билан учрашиб турганидан мамнунлигини билдирди. Шунингдек, йиғилиш иштирокчиларини Ўзбек тили байрами билан табриклаб, Қашқадарё фарзанди, Ўзбекистон Қаҳрамони ва давлат мадҳияси муаллифи Абдулла Ориповни ёдга олди.

Президент бир неча йил аввал энг мураккаб вазиятдаги ҳудудлардан бири бўлган Қашқадарёни йил якунига қадар камбағаллик ва ишсизликдан холи ҳудудга айлантириш мақсад қилинганини таъкидлади. Унинг қайд этишича, бу натижага эришиш учун аниқ ҳисоб-китоблар мавжуд.

“Кеча вилоятнинг шаҳар ва туманларида, маҳаллаларида бўлган ўзгаришларни кўриб, тадбиркор, инвестор, ёшларнинг кўзларидаги шижоатни кўриб, жуда катта куч олдим”, — деди давлат раҳбари.

Йиғилишда «Султонтекс» кластери раҳбари Нурбек Эргашевнинг энергия ва сувни тежайдиган замонавий корхонаси фаолияти ҳам тилга олинди. Тадбиркорнинг 2028 йилгача яна 30 минг кишини иш билан таъминлаш, айниқса, аёллар учун кўпроқ имконият яратиш режалари қўллаб-қувватланди.

Президент Нурбек Эргашевга “Ўзбекистонда хизмат кўрсатган тадбиркор” фахрий унвонини бериш тўғрисидаги фармонни имзолаганини маълум қилди.

Шунингдек, Қамаши туманидаги Чим маҳалласида лимончиликни ривожлантириб, аҳоли даромадларини оширишга ҳисса қўшаётган Абдуманноп Худойбердиевга “Ўзбекистонда хизмат кўрсатган қишлоқ хўжалиги ходими” унвони берилиши айтилди.

Қашқадарёда маърифатни тарғиб қилаётган «Мутолаа» лойиҳаси бош муҳаррири Жавлон Жовлиевнинг меҳнати ҳам эътироф этилди. Бундан ташқари, “Ёш китобхон оила” республика танлови ғолиблари Бахтишод Рашидов ва Эъзоза Хушвақтовага Тошкент шаҳридан икки хонали янги хонадонлар совға қилиниши маълум қилинди.

Давлат раҳбари ушбу мукофотларни йиғилишнинг ўзида топширишни таклиф этди.