Метродаги “пробка”: “Пахтакор”даги тирбандликка изоҳ берилди
Йўловчилар тўпланишини камайтириш учун поездлар ҳаракати интервалларини қисқартириш чоралари кўрилмоқда.
Ижтимоий тармоқларда «Пахтакор» метро бекатида йўловчилар тирбандлиги юзага келгани ҳақида хабарлар тарқалди. “Тошкент метрополитени” АЖ мазкур ҳолат юзасидан расмий муносабат билдирди.
Қайд этилишича, ҳодиса 20 октябрь куни тахминан соат 17:43 да кузатилган. Бекатга икки поезднинг бир вақтнинг ўзида келиши йўловчилар оқимининг вақтинча ортишига сабаб бўлган. Метрополитен маъмурияти бундай ҳолатлар йўловчилар кўп бўладиган тиғиз вақтларда кузатилишини ва оқим бир неча дақиқада меъёрлашишини маълум қилган.
Айни пайтда Тошкент метрополитенида кунлик йўловчилар оқими 1,2 миллион нафардан ошиб бораётгани сабаб бекатларда тўпланишларни камайтириш мақсадида поездлар ҳаракати интервалларини қисқартириш чоралари кўрилмоқда.
Унга кўра, поездлар ҳаракати интерваллари қуйидагича белгиланиши режалаштирилган:
-
Чилонзор йўналишида — 1,5–2 дақиқа;
-
Ўзбекистон йўналишида — 3 дақиқа;
-
Юнусобод йўналишида — 4 дақиқа;
-
Ер усти ҳалқа йўли йўналишида — 7–8 дақиқа.
Метрополитен маъмурияти йўловчилар оқимини бошқариш, поездлар ҳаракати барқарорлигини таъминлаш ҳамда қулай ва хавфсиз транспорт хизматини кўрсатиш бўйича ишлар олиб борилаётганини билдирган.
