Балиқчилик ва лимончилик: минглаб оилалар даромади оширилади
Ўзбекистонда 4 мингдан ортиқ қудуқ негизида балиқчиликни ривожлантириш, 200 гектар майдонда энерготежамкор иссиқхоналар қуриш режалаштирилмоқда.
Президент Шавкат Мирзиёев интенсив балиқчиликни ривожлантириш ва энерготежамкор лимончилик иссиқхоналарини ташкил этиш бўйича тақдимот билан танишди. Лойиҳалар орқали янги иш ўринлари яратиш ва аҳоли даромадларини ошириш режалаштирилмоқда.
Мамлакатда йилига 1 миллион тонна балиқ етиштириш мақсад қилинган. Шу муносабат билан Андижон вилоятининг Балиқчи туманидаги 24 та мелиоратив тик қудуқ атрофида интенсив балиқчилик мажмуаларини ташкил этиш таклиф қилинди.
Ҳар бири 50 сотих майдонни эгаллайдиган лойиҳаларда йилига камида 30 тонна форель етиштириш ва 10 та иш ўрни яратиш кўзда тутилган. Балиқчилик жараёнларини ягона тизимда бошқариш учун холдинг ташкил этиш ҳам таклиф қилинди.
Балиқчи тажрибасини бошқа ҳудудларда қўллаш мақсадида 2027 йил 1 мартга қадар республикадаги 4 мингдан ортиқ мелиоратив тик қудуқ хатловдан ўтказилади. Балиқ етиштиришга яроқли қудуқларни илғор тадбиркорларга давлат-хусусий шериклик асосида бошқарувга бериш режалаштирилган. Хонободда совуқ сув балиқларини етиштириш ва қайта ишлаш, Улуғнорда эса сув ҳавзалари негизида балиқчилик лойиҳаларини амалга ошириш ҳам кўзда тутилмоқда.
Тақдимотда лимончиликни ривожлантириш масаласи ҳам кўриб чиқилди. Балиқчи туманидаги тўққизта маҳалла атрофида 100 гектар майдонда энерготежамкор иссиқхоналар қуриб, уларни тайёр ҳолда тадбиркорларга таклиф этиш режалаштирилган. Лимон етиштиришдан тортиб, уни қайта ишлаш, қадоқлаш, сақлаш ва сотишгача бўлган жараёнлар ягона кооперация тизимига бирлаштирилади.
Дастлабки ҳисоб-китобларга кўра, 500 та иссиқхонада маҳаллий оилалардан камида 1 минг киши иш билан таъминланади. Лимон кўчатлари ҳосилга киргунига қадар оралиқ экинлар етиштириш орқали ҳам қўшимча даромад олиш имконияти яратилади.
Балиқчи тажрибаси асосида келгуси йилда ҳудудларда жами 200 гектар майдонда энерготежамкор иссиқхона мажмуалари барпо этиш режалаштирилган. Бу орқали камбағал оилалар ва ишсизларни қамраб олиб, 2 мингта оиланинг даромадини ошириш кўзда тутилмоқда.
Тақдимот якунида давлат раҳбари лойиҳаларни молиявий қўллаб-қувватлаш ҳамда аҳолини балиқчилик ва лимончиликка ўқитиш харажатларини қоплаш бўйича мутасаддиларга топшириқлар берди.
