“Толибон”: Панжшер тўлиқ эгалланди
Панжшер вилояти тўлиқ толиблар назоратига ўтди. Бу ҳақда ҳаракат расмий вакили Забиҳулло Мужоҳид маълум қилди.
Шар
“Ёлланма душманларнинг сўнгги қароргоҳи, Панжшер вилояти эгалланди. Мамлакатда хавфсизлик ўрнатишга қаратилган охирги ҳаракатлар ўз самарасини берди ва Панжшер Афғонистон Ислом Амирлигининг тўла назоратига ўтди”, деган Мужоҳид ўз “Твиттер” саҳифасида.
Унинг сўзларига кўра, исёнчиларнинг акcарияти жангларда ўлган, баъзилари қочиб кетган. Толиблар Панжшер аҳолисини таъқиб қилмасликка ваъда берган.
Бундан аввал Миллий Қаршилик фронти етакчилари Амрулла Солиҳ ва Аҳмад Масъуд Афғонистонни тарк этгани хабар қилинган эди. Аммо Масъуд тарафдорлари унинг Панжшерда эканини айтмоқда. Қўмондоннинг ўзи Панжшерга қарши толиблар эмас, Покистон армияси ва разведкаси уруш олиб бораётганини таъкидлади. Баъзи манбалар буни тасдиқлаган. Хусусан, Покистон махсус кучлари вилоятга кириб келган. Исломобод ҳарбий-ҳаво кучлари дронлари бошқариладиган ракеталар билан зарба берган.
5 сентябрь куни Аҳмад Масъуд “Толибон” ҳужумни тўхтатган тақдирда музокараларга тайёрлигини айтган. Аммо бу таклифни толиблар рад этди. Кейинчалик Қаршилик фронти тинчлик музокаралари ҳақида декларация ҳам эълон қилганди.
Жаҳонгир Қўзиев
