"Алоҳида муносабатлар белгиси". Зеленский Байден билан телефон орқали мулоқот қилди
Унда "Россия босқини" ҳам муҳокама қилинган.
2 январь куни АҚШ президенти Жозеф Байден ва Украина президенти Владимир Зеленский ўртасида телефон мулоқоти бўлиб ўтди. Бу ҳақда “ТАСС” хабар берди.
Унда Россия билан бўлажак музокаралар, Донбассдаги вазият ҳамда Украина суверенитети марказий мавзулардан бўлди.
“Томонлар кейинги ҳафтада бошланадиган Женевадаги стратегик барқарорлик бўйича икки томонлама (Россия-АҚШ) мулоқотни, Россия-НАТО кенгаши, шунингдек, ЕХҲТ билан бўлиб ўтадиган музокараларни қўллаб-қувватлади. Президент Байден АҚШ ва унинг иттифоқчилари “сизнинг иштирокингизсиз сиз ҳақингизда ҳеч нарса” тамойилига содиқ эканини яна бир бора маълум қилди”, – дейилади Оқ уй матбуот хизматида.
Шу билан бирга Америка етакчиси Украина суверенитети ҳамда ҳудудий яхлитлигини қўллаб қувватлашини таъкидлаган. Байден Россия томонидан Украинага ҳужум уюштирилган тақдирда Вашингтон ва иттифоқчиаар қатъий жавоб беришини алоҳида қайд этган.
Владимир Зеленский ўз навбатида АҚШ раҳбари билан ислоҳотлар ва олигархларга қарши кураш масаласини ҳам муҳокама қилган. У Байден билан телефон мулоқоти икки давлат ўртасидаги муносабатлар алоҳида характерга эга эканини таъкидлаган.
Аввалроқ Украинада Россия кемаларига қарши қаратилган янги қонун кучга киргани ҳақида хабар берилганди.
Жаҳонгир Қўзиев
