Антониу Гутерриш: Ғазо аҳолиси ташқи ёрдамга жуда муҳтож

 

БМТ Бош котиби Миср ташқи ишлар вазири Самеҳ Шукрий билан Қоҳирада ўтказган қўшма матбуот анжуманида зудлик билан гуманитар ўт очишни тўхтатишга чақирди.

 

"Мен инсонпарварлик миссияси билан Яқин Шарқдаман. Минтақа чуқур инқирозга юз тутди: 7 октябрь куни Исроилда ва бутун дунёда кўп сонли тинч аҳоли ҳалок бўлган, яраланган ва ўғирлаб кетилган даҳшатли террор ҳужумлари содир бўлди", — деди Антониу Гутерриш.

 

Бирлашган Миллатлар Ташкилоти раҳбарининг сўзларига кўра, ҲАМАС ҳужуми ва одамларни гаровга олиш Исроил Ғазони тўлиқ қамал қилиши ва "узлуксиз бомбардимон кампаниясини" бошлашига олиб келди. Бу эса тинч аҳоли, жумладан, аёллар, болалар, журналистлар ва гуманитар ташкилотлар, шунингдек, БМТ ходимлари ўлими сонининг тобора ортиб боришига олиб келди.

 

Гутерриш Фаластин халқининг ўнлаб йиллар давом этган истилодан сўнг “қонуний ва асосли шикоятлари” борлигини таъкидлади.

 

"Аммо бу шикоятлар қанчалик жиддий бўлмасин, улар бундай даҳшатли терактларни оқлай олмайди. Бу ҳужумлар, ўз навбатида, Фаластин халқини жамоавий жазолаш учун асос бўлмайди", — БМТ бош котиби.

 

Бош котибининг эслатишича, Ғазо аҳолиси қарийб икки ҳафта давомида озиқ-овқат, сув, дори-дармон ва бошқа зарур маҳсулотларсиз қолмоқда. Унинг сўзларига кўра, Ғазонинг тинч аҳолиси ташқи ёрдамга ўта муҳтож ҳамда тўсиқсиз, жуда тез инсонпарварлик ёрдамини талаб қилади.

 

"Мен Мисрда БМТнинг Ғазо халқи ҳаётини сақлаб қолиш учун кенг кўламли ёрдам кўрсатишга тайёргарлигини кузатиш учун келдим. Ал Ариш аэропорти ва Рафаҳ ўтиш жойи Ғазо аҳолиси учун ягона умид манбаи бўлиб қолмоқда", — деди у.

 

Эслатиб ўтамиз, аввалроқ Миср ва АҚШ Ғазо секторига гуманитар ёрдам етказишга келишиб олгани хабар қилинганди.