АҚШ Афғонистонда қанча ҳарбий техника қолдириб кетган?
Унинг умумий қиймати очиқланди.
АҚШ Афғонистонда 7 миллиард доллардан ортиқ ҳарбий техника қолдириб кетган. Бу ҳақда CNN хабар берди.
Телеканал Пентагоннинг Конгрессга тақдим этган ҳисоботига асосланиб юқоридаги хабарни тарқатган. Унга кўра, Қўшма Штатлар 2005-2021 йилларда афғон ҳукуматига жами 18.6 миллиард долларлик ҳарбий анжомлар тақдим этган. 2021 йилда Америка қўшинлари Афғонистонни тарк этгач, бу ерда 7.12 миллиардлик ускуна қолиб кетган. Ҳозирда у "Толибон" қўлига ўтган.
CNN маълумотларига асосан, Афғонистонда Америка самолётлари, ҳарбий автомобиллар, алоқа воситалари ва бошқа ускуналар қолган. Пентагон ортга қайтиб уларни қайтариб олиб келишни ёки ўша жойнинг ўзида йўқ қилишни режалаштирмаяпти. Шу билан бирга техниканинг катта қисми ишлаб туриши учун доимий равишда хизмат кўрсатилишга муҳтож.
Аввалроқ Афғонистон мудофаа вазири Покистон авиазарбаларига кескин норозилик билдирганди.
