АҚШ Эронга яна зарба бериши мумкин — Трамп
Бунга Эрон раҳбариятининг Вашингтон билан келишувга эришишдан бош тортиши ва ракета дастурини давом эттириши сабаб қилиб кўрсатилди.
Доналд Трамп агар Эрон раҳбарияти Вашингтон билан келишувга эришишдан бош тортса ва ракета дастурини давом эттирса, Теҳронга яна зарба бериш эҳтимоли мавжудлигини маълум қилди. Бу ҳақда у Оқ уйда журналистларнинг саволларига жавоб берар экан айтиб ўтди дейди media.az нашри.
Трампнинг сўзларига кўра, АҚШ қуролли кучларининг Фордов, Натанз ва Исфаҳондаги Эрон ядровий иншоотларига қаратилган аввалги зарбалари Яқин Шарқда муҳим келишувга эришиш учун зарур бўлган. У Эрон ядровий дастури қайта тикланиши учун вақт талаб этилишини, бироқ келишувсиз қайта тиклашга уриниш бўлса, АҚШ бу жараённи яна йўқ қилишга қодирлигини таъкидлади.
“Эрон ядровий дастурини давом эттиришга уриниши мумкин. Улар тикланиши учун анча вақт керак бўлади. Аммо агар улар биз билан келишувсиз бу йўлни танласалар, биз уни яна йўқ қиламиз. Уларнинг ракеталарини жуда тез йўқ қила оламиз”, деди Трамп.
Эслатиб ўтамиз, ноябрь ойининг бошида Эрон ташқи ишлар вазири Аббос Арағчи “Al Jazeera”га берган интервьюсида мамлакат уранни тинч мақсадларда бойитишда давом этишини билдирган эди. Шунингдек, у Эрон ракета дастурининг келажаги бўйича музокара ўтказиш масаласини қатъиян рад этганини ва “унинг ҳарбий таркибий қисмидан воз кечишга ҳеч бир ақли расо одам рози бўлмаслигини” қайд этган.
