АҚШ "Толибон" билан учрашишдан бош тортди
Давлат департаменти бу қарор толиблар билан муносабатлардаги бурилиш нуқтаси бўлишини айтган.
АҚШ "Толибон" билан Доҳадаги музокараларини бекор қилди. Бу ҳақда Давлат департаменти матбуот котиби ўринбосари Жалина Портерга асосланиб, "ТАСС" хабар берди.
"Доҳадаги бекор қилинган учрашувларга келадиган бўлсак, ҳақиққатдан ҳам айрим мулоқотларни тўхтатдик. Бу ўзаро муносабатлардаги бурилиш нуқтаси бўлиши мумкин", — деган у.
Бундан олдин "Толибон" ўрта ва юқори синфларда ўқийдиган қизларнинг мактабга боришини тақиқлаб қўйганди. АҚШ, Буюк Британия ва Европа Иттифоқи давлатлари бу қадамни қоралаб чиқди.
Портернинг сўзларига кўра, толибларнинг бу қарори афғон халқи иқтисодий ўсиши ҳамда "Толибон"нинг халқаро миқиёсда тан олиниши истиқболларига катта зарар етказади.
У толибларни яна бир марта ўз мажбуриятларини бажаришга чақирган. Давлат департаменти вакили сўзларига кўра, аёллар таълимига рухсат бериш орқали иқтисодиёт ва жамият потенциалини тўла очиб бериш мумкин.
Аввалроқ Афғонистонда наркотиклар савдоси ошгани тўғрисида хабар берилганди.
