АҚШ ва Россия муҳим йўналишда музокара олиб бораётгани маълум қилинди

 

АҚШ ва Россия киберхавфсизлик бўйича ёпиқ форматда музокаралар олиб бораётгани маълум бўлди. Бу ҳақда The New York Times хабар берди.

 

Музокараларда АҚШ томонига президентнинг миллий хавфсизлик масалалари бўйича маслаҳатчиси ўринбосари Энн Нюбергер бошчилик қилмоқда. Нашр маълумотларига кўра, Қўшма Штатлар ва Россия раҳбарларининг июнь ойидаги учрашувидан кейин томонлар турли масалалар бўйича мулоқот ўтказган. Шу билан бирга, мақола муаллифлари Вашингтон ва Москва ўртасидаги стратегик барқарорлик бўйича музокаралар сўнгги йиллардаги энг чуқур мулоқотга айланганини қайд этди.

 

Хабарда айтилишича, Нюбергер бир неча бор россиялик ҳамкасблари билан виртуал учрашув ўтказган. Бундан ташқари, бир неча ҳафта аввал Москвага Америкага киберҳужум уюштирган хакерлар тўғрисида маълумотлар тақдим этилган. Нашрнинг таъкидлашича, "АҚШ бу маълумотлар жиноятчиларни қамоққа олинишига умид билдирмоқда". Шу орқали Вашингтон Россиянинг кибержиноятларга қарши курашиш тўғрисидаги нияти қай даражада эканлигига баҳо бермоқчи.

 

Аввалроқ бир гуруҳ машҳур шахсларнинг шахсий маълумотлари хакерлар томонидан ўғирлангани ҳамда Буюк Британия ўзига зарар етказган давлатларга қарши киберҳужумлар уюштириши хабар қилинганди.

 

Жаҳонгир Қўзиев