АҚШнинг ўнлаб жосусларини чет эл махсус хизматлари йўқ қилган — “New York Times”
АҚШ Марказий Разведка Бошқармасининг ўнлаб агентлари қамоққа олинган ёки ўлдирилган. Бу ҳақда “New York Times” хабар берди.
Гап Америка разведкасининг чет элдаги маълумот тўпловчилари ва жосуслари ҳақида бормоқда. “New York Times” бунга кадрларни етарлича тайёрламай қабул қилиш ва чет эл махсус хизматлари имкониятига тўғри баҳо бермасликни асосий сабаб қилиб кўрсатган.
Марказий Разведка Бошқармаси шундан кейин ўз зобитларидан чет элдаги жосуслик резидентуралари ишини яхшилашни талаб қилган. Қўлга олинган агентларнинг аниқ сони келтирилмаган. Аммо Россия, Хитой, Эрон ва Покистон АҚШ жосусларини топиш ва йўқ қилиш бўйича самарали ишлаётгани таъкидланган.
Марказий Разведка Бошқармаси агентларнинг йўқ қилинишида чет эл махсус хизматларининг профессионаллиги эмас, балки Америка контрразведкасидаги хоинликлар сабаб бўлганини қайд этган. Маълум бўлишича, айрим контрразведка зобитлари чет эл махсус хизматларига махфий маълумотларни тақдим этган.
Бундан аввал дунёдаги 11 та давлат жосуслик тизими орқали сиёсатчиларни кузатгани ҳамда РФда Ўзбекистон фуқароси Украина фойдасига жосуслик қилганликда айбланаётгани хабар қилинганди.
Жаҳонгир Қўзиев
