Тошкент шаҳрининг Яшнобод туманида жойлашган Авиатор савдо мажмуасида содир бўлган ёнғин ҳолати бўйича жиноят иши очилди. Бу ҳақда Бош прокуратура матбуот котиби Ҳаёт Шамсутдинов Zamon.uz'ga маълум қилди.
Қайд этилишича, мазкур ҳолат юзасидан Ўзбекистон Республикаси Жиноят кодексининг 192¹¹-моддаси (Нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш) ҳамда 259-моддаси (ёнғин хавфсизлиги қоидаларини бузиш) билан жиноят иши қўзғатилган.
Эслатиб ўтамиз, ёнғин жорий йил 31 январь куни тушдан кейин савдо мажмуасининг иккинчи қаватида юз берган. Ёнғин натижасида тахминан 800 квадрат метр майдон зарар кўрган. Ҳодисани бартараф этиш учун 12 та асосий ва 4 та махсус техника ҳамда 6 та сув ташувчи восита сафарбар қилинган.
Фожиали ҳодисадан сўнг вайроналар остидан 3 ёшли қизалоқнинг жасади топилган.