Австрияда коронавирусга қарши эмланмаган фуқароларга чекловлар жорий этилди
Бу ҳақда Австрия канцлери Александр Шелленберг маълум қилган.
Австрияда 15 ноябрьдан коронавирусга қарши кураш доирасида янги чекловлар жорий этилди. Бу ҳақда "ТАСС" хабар берди.
Маълумотларга кўра, бу чекловлар Covid-19’га қарши эмланмаган фуқароларга нисбатан жорий қилинади. Мамлакат канцлери Александр Шелленберг эмланмаганларга нисбатан локдаун қўлланилишини маълум қилган. Унинг сўзларига кўра, бу чекловлар 12 ёшдан катта фуқароларга нисбатан жорий этилган. Эндиликда вакцина қабул қилмаганлар фақатгина зарурий маҳсулотлар сотиб олиш ва ишга ҳамда сайр қилишга чиқиши мумкин.
Шунингдек, Австрия соғлиқни сақлаш вазири Вольфганг Мюкштайн мамлакатда тунги комендантлик соати жорий қилиниши мумкинлигини айтган. Бу тақиқ коронавирусга қарши эмланган ва эмланмаганларга бирдек тааллуқли бўлади.
Аввалроқ Хитой шимолида янги коронавирус чекловлари жорий этилгани ҳамда Россия олимлари коронавирус тарқалишини тўхтатадиган янги моддани аниқлагани тўғрисида хабар қилинганди.
Жаҳонгир Қўзиев
