72 гектар майдонни эгаллаган ушбу заводда автомобиль майда деталларда йиғилиб, яхлит ҳолга келтирилади. Корхонанинг пресслаш цехида 2 та асосий — бири 2 250 тонна, яна бири 1 800 тонна оғирлик билан панель штампловчи линия мавжуд бўлиб 4 та модель панели ишлаб чиқарилади.
Акмалжон Йўлчиев, пресслаш цехи бошлиғи:
— Дастлаб хомаки маҳсулот биринчи роботлар олади ва унга пресс ёрдамида шакл беради. Сўнг тешиш ва фленж шаклида букиш амалиёти бажарилади. Маҳсулот тайёр панель ҳолатга келтирилади. Умумий ҳисобда кунига 13-14 мингта панель ишлаб чиқарилади. Тайёр панеллар сифати бирма-бир текширилади.
Пресслаш цехида тайёр бўлган автомобиль деталлари каралар ёрдамида пайвандлаш бўлимига олиб келиниб, бир-бирига пайвандланади. Тайёр кузов ҳолатига келтирилади.
Кунлик режа бўйича икки смена давомида "Cobalt" автомобили учун 450 дона кузов, бир сменада эса 100 та "Spark" автомобили ишлаб чиқарилади. Бу бўлимда ҳам кучли сифат назорати ўрнатилган. Кузовни ҳар бир қисми синчиковлик билан текшириб чиқилади. Агар бирор муаммо аниқланса, шу ернинг ўзида бартараф этилади.
Сифат назорати якунлангач, тайёр кузовлар бирин-кетинликда лента ёрдамида бўёқлаш цехига юборилади. У ерда тайёр ҳолга келган кузовлар 13 хил рангга бўялади. Полировка қилиниб, йиғиш цехига юборилади.
Ушбу бўлимда 575 ишчи ҳамда автоматлаштирилган роботлар ёрдамида ҳар 1 ярим дақиқа ичида биттадан кузовларнинг ички ва ташқи қисми бўялади.
Умиджон Саримсоқов, бўёқлаш цехи раҳбари:
— Бўёқ цехида автомобиль юза қисми полировка қилинади. Аниқланган майда миллиметрли, микронли нуқсонлар бартараф этилади. Баъзи ҳолларда 5 % кузовда аниқланган нуқсонни бартараф этиш имкони йўқ. Шу сабаб улар қайтадан таъмирланади. Шундан сўнг бўялган, сайқалланган кузовлар навбатдаги манзил — йиғув цехи томон йўл олади.
У ерда 2 та линия орқали "Cobalt" ва "Nexia-3" моделига 2 722 та "Gentra" ҳамда "Spark" моделига эса 1 614 дона деталлар ўрнатилиб, якуний сифат назоратидан ўтказилади. Ҳар бир автомобилнинг ўзининг текширув бланкаси бор. Унга текширувчи оператор бевосита жавобгар. Оператор бошдан оёқ назоратдан ўтказади.
Сўнгги босқичда тайёр бўлган автомобилнинг юриш қисми турли тўсиқларда синовдан ўтказилиб, сифат назоратига тўлиқ жавоб берган автомашиналар тураргоҳга жойлаштирилади.