БААда афғон қочқинлари норозилик намойиши ўтказди
Улар тезроқ бошқа давлатларга кетишни истамоқда.
БААдаги афғон қочқинлари доимий яшаш жойига жўнатиш бўйича ноаниқликлар туфайли норозилик намойиши ўтказди. Бу ҳақда Reuters агентлиги хабар берди.
Уларнинг аксарияти 2021 йил баҳорида Афғонистонни тарк этган. Қочқинлар лагеридаги афғонлардан бири душанба ва сешанба кунлари норозилик намойишлари ўтказилганини маълум қилган. минглаб мигрантлар АҚШ ва бошқа Ғарб давлатларига олиб кетилишини кутмоқда.
“Бизни бир йилдан буён ҳибсда ушлаб туришибди. Бу лагерь замонавий турмага ўхшайди. Ҳеч кимга чиқишга рухсат берилмайди. Биз қачон бошқа давлатга кетишни билмаймиз”, – деган қочқинлардан бири.
БАА расмийлари афғонистонликларнинг хавфсиз ва муносиб ҳаёт кечиришига содиқ эканини таъкидлаган. Шу билан бирга улар мигрантлар орасида норозилик кайфиятлари кучайганини тан олган. Абу-Даби АҚШ элчихонаси билан қочқинларни Қўшма Штатлар ёки бошқа давлатларга кўчириш масаласида ишламоқда.
Аввалроқ дунёнинг етакчи иқтисодчи экспертлари Байдендан музлатилган афғон активларини қайтаришни сўраганди.
