“Барса”нинг ғалабали церийаси якунланди

 

Испания чемпионатининг дастлабки етти турида кетма-кет ғалаба қозонган "Барселона"нинг cерияси якунига етди. 8-турда "Осасуна" меҳмони бўлган жамоа барчани ҳайратда қолдирди. Флик клубда яна бир ўзгаришни амалга оширишга қарор қилди. Жамоанинг икки энг яхши футболчиси Рафиня ва Ямал захирада қолдирилди. Мураббий бу футболчиларни Чемпионлар лигаси учун сақлаб қўйишни мақсад қилган бўлиши мумкин. Натижада "Осасуна" ўзини хотиржам ҳис қилди.

 

18-дақиқадаёқ "Осасуна" ҳисобни очди. Сарагоса чап қанот бўйлаб олдинга юрди ва Будимирга узатма берди. Жамоадоши эса ундан унумли фойдалана олди. Голдан атиги 10 дақиқа ўтиб, "Осасуна" иккинчи голни киритишга муваффақ бўлди. Бу сафар Сарагосанинг ўзи "Барса" дарвозабонини чиройли тарзда алдаб ўтиб, бўш қолган дарвозага тўп киритди. Бундай вазиятда ҳатто Тер Штеген ҳам "Барса"ни қутқара олмасди.

 

"Барселона" биринчи бўлимда 72% тўпга эгалик қилди, аммо "Осасуна" энг яхши имкониятларга эга бўлди. Танаффусда Флик ўзгартиришларга қўл уриши мумкин эди, аммо бу амалга ошмади. Иккинчи бўлим бошида эса "Барселона" битта голли фарқни йўққа чиқарди. "Осасуна" дарвозабонининг хатоси каталонияликларга ёрдам берди. Бир неча дақиқа ўтиб Виктор Пау жамоасининг навбатдаги голига муаллифлик қилди. Шундан сўнг Флик бир вақтнинг ўзида Ямал ва Рафиняни майдонга туширди. Тезкор ҳужумлар натижасида "Барса"нинг ҳимоясида бўшлиқлар юзага келишни бошлади. Ферран Торрес ҳисобни тенглаштириш учун ажойиб имкониятга эга бўлди, лекин унинг зарбасини дарвозабон бартараф этди.

 

Мезбонларнинг навбатдаги қарши ҳужуми Домингеснинг қўполлиги учун "Барса" дарвозасига белгиланган пенальти билан якунланди. Пенальтини Будимир аниқ амалга ошириб ҳисобни янада ишончли кўринишга олиб келди. Шундан сўнг "Барселона" тўлиқ ҳимоявий ўйин намойиш этган мезбонларга қарши ҳеч нарса қила олмади. Каталонияликлар ўйин сўнггида ҳам таслим бўлмади. Ямалнинг 89-дақиқадаги голи ҳисобни қисқартиришга ёрдам берди. Шу тариқа, "Барселона"нинг ғалабали cерияси якунига етди. "Реал" "Атлетико"га қарши дербида ғалаба қозонган тақдирда ҳам, Флик жамоаси тур якунида биринчи ўринда қолади.