Байден 2024 йилги сайловда ҳам иштирок этиш ниятида
Президентнинг рейтинги эса сўнги ҳафталарда тобора пасайиб бормоқда.
Оқ уй матбуот котиби Жен Псаки АҚШ президенти Жо Байден 2024 йилда иккинчи муддатга сайланиш ниятида эканини тасдиқлади.
"Унинг иккинчи муддатга ўз номзодини қўйиш нияти бор", деди Псаки Байденнинг навбатдаги президентлик сайловларида иштирок этиш истаги ҳақида сўраган журналистларга.
Шунингдек, матбуот котиби бир қатор Америка оммавий ахборот воситаларининг сўнгги кунлардаги мавзусига айланган масалага ойдинлик киритган. Америка Қўшма Штатлари Президенти 2024 йилги сайловларда иштирок этиш истагини ўтган йилги инаугурация маросими пайтдан эълон қилганди:
"Мен иккинчи муддатга номзодимни қўйишни режалаштирмоқдаман. Мен буни кутаман", — деган эди Байден.
Президентнинг рейтинги сўнги ҳафталарда доимий равишда пасайиб бормоқда. Буни сўровлар натижалари, ҳатто унга содиқ бўлган оммавий ахборот воситалари ҳам тасдиқлайди.
Мисол учун, ноябрь ойида "УСА Тодай" ва «Суффолк» университети томонидан эълон қилинган сўров шуни кўрсатдики, Қўшма Штатлардаги сайловчиларнинг атиги 38 фоизи Байден фаолиятини қўллаб-қувватлайди. Кўпчилик унинг иккинчи муддатга сайланишига қарши.
Маълумот учун: 2024 йилда АҚШ президенти 82 ёшга тўлади.
Эслатиб ўтамиз, Оқ уйнинг собиқ раҳбари Доналд Трамп ҳам навбатдаги сайловда иштирок этишини билдирганди. Шунингдек, Байден АҚШнинг "ўйинга қайтгани"ни маълум қилганди.
Насиба Тўхтаева
