АҚШ Конгресси Вакиллар палатаси спикери Кевин Маккарти Жо Байденга қарши импичмент жараёни доирасида расмий тергов бошланганини маълум қилди.
“Ҳокимиятни суиистеъмол қилиш ва коррупцияга оид айбловлар Вакиллар палатаси томонидан қўшимча кўриб чиқилишини талаб қилади. Шунинг учун мен Вакиллар палатаси қўмитасига президент Жо Байденга нисбатан расмий импичмент бўйича терговни бошлашни буюраман”, — деди Кевин Маккарти.
Маккарти Жо Байденни ёлғонда айблади. Спикернинг айтишича, унинг оила аъзолари чет эл фирмаларидан миллионлаб доллар ишлаб топган ва бу ҳақда президентнинг ўзи ҳам билади. Байден ўғли Хантернинг хорижий бизнес операцияларидан даромад ҳам олган.
Республикачилар партияси аъзолари президентга импичмент эълон қилиш учун ҳали етарли далилларга эга эмаслар. Байден барча айбловларни қатъиян рад этади ва Оқ уй содир бўлаётган воқеаларни энг ёмон “экстремал сиёсат” деб атади.