Бир гуруҳ афғон учувчилари АҚШга эвакуация қилинди
Улар Тожикистонда сақланаётган эди.
Тожикистонда бўлиб турган афғон фуқаролари ва ҳарбий учувчилари АҚШга олиб кетилди. Бу ҳақда Reuters хабар берди.
Унга кўра "Толибон" ҳокимияти ўрнатилгандан сўнг бир гуруҳ афғон ҳарбий-ҳаво кучларининг аскарлари Тожикистонга қочган ва бу ёрда маҳаллий ҳокимият вакиллари томонидан қўлга олинган. Сентябрь охирида Пентагон раҳбари Ллойд Остин уларни АҚШга олиб кетилишига ваъда берганди.
Reuters маълумотларига кўра, собиқ ҳарбийлар Тожикистондаги санаторийлардан бирида сақланган. Уларнинг баъзилари тожик расмийлари қочқинларнинг ҳужжатларини олиб қўйганлигини иддао қилган.
Шу билан бирга АҚШ конгрессининг айрим аъзоларида уларни Америкага эвакуация қилинишидан хавотир билдирган. Аммо Жоржия штати вакили Остин Скот эвакуация қилинаётганлар орасида ҳомиладор аёл борлигини маълум қилиб, қочқинлар айнан АҚШга эвакуация қилинаётганлигидан енгил тортганини таъкидлаган.
Аввалроқ Ҳиндистонда Афғонистонга оид минтақавий учрашув бўлиб ўтиши хабар қилинганди.
Жаҳонгир Қўзиев
