“Биз текширувчимиз. 25 000 сўмдан пул йиғиб юрибмиз”

 

 

Олот туман Ички ишлар бўлими маълумотларига кўра, шу туманда яшовчи фуқароларнинг хонадонларига номаълум шахслар ташриф буюриб, дудбуронларини тозалаш, ўт ўчириш хизмати кўрсатиш, электр энергияси тармоқларини текшириб, ноқонуний пул йиғган. Гарчи улар бирор-бир хизмат кўрсатмаган бўлсалар-да, 49 та ҳолатда 25 000 сўмдан фуқаролардан пул йиғиб, фирибгарлик жиноятини содир этган.

 

Мазкур ҳолат юзасидан номаълум шахсларга нисбатан жиноят иши қўзғатилиб, кечиктириб бўлмас тергов ҳамда тезкор суриштирув ҳаракатлари олиб борилган.

 

Аниқланишича, ушбу жиноятни Бухоро тумани Работиқалмоқ маҳалласида яшовчи, 1994 йилда туғилган “Газ ва электрдан махсус назорат” МЧЖ раҳбари Ж.М. содир қилганлиги аниқланган.

 

Ҳозирда ушбу фуқаронинг шу каби жиноятларга алоқадорлигини текшириш юзасидан дастлабки тергов ҳаракатлари давом эттирилмоқда.

 

Эслатиб ўтамиз, аввалроқ суд сохта хизмат давлатчиси ишига қонуний баҳо бергани ҳамда антикоррупция агентлиги сохта ходим бўйича огоҳлантириш билан чиққани ҳақида хабар берилганди.

 

Баҳринисо Мадумарова тайёрлади.