Ижтимоий тармоқда Тошкент вилоятининг Бўстонлиқ туманида бир гуруҳ шахслар автомашинада гуруҳ бўлиб ҳаракатлангани акс этган видео тарқалганди. Ҳолат юзасидан Тошкент вилояти ИИБ ЙҲХБ маълумот берди.
Қайд этилишича, автомашиналарда бўлган йўловчилар автомобиль ойнасидан тана қисмини чиқариб, ўзларининг ҳаётини хавф остига қўйишган. Ушбу воқеалардан сўнг Тошкент вилояти ИИБ ЙХХБ ходимлари томонидан тезкорлик билан суриштирув ишлари амалга оширилиб, 5 та автомашина Тошкент вилоятида, битта транспорт воситаси эса Қашқадарё вилояти ҳудудида аниқланиб, ҳайдовчиларнинг барчасига маъмурий баённомалар расмийлаштирилган.
Йўл ҳаракати қоидаларини бузиб ҳаракатланган ҳайдовчиларнинг транспорт воситалари вақтинчалик сақлаш учун жарима майдончасига жойлаштирилган.
Суд қарорига кўра, ижтимоий тармоқларда тарқалган видеодаги ҳуқуқбузарлик содир этган 10 нафар шахсларга 10 сутка маъмурий қамоқ жазоси тайинланди. Бир нафар фуқарога эса фарзанди борлиги сабабли жарима жазоси қўлланилди.