Бухоро вилоятининг Когон шаҳрида сохта солиқчи фош этилди, дея хабар бермоқда вилоят ИИБ ахборот хизмати.
Маълум бўлишича, Вобкент тумани «Чармгарон» маҳалласида яшовчи 2000 йилда туғилган Б.С. исмли шахс “Сабина Самира чорваси” оилавий корхонаси раҳбари T.A.ни алдаб, унга ўзини Когон шаҳар ДСИ ходими дея таништирган. У корхонага тегишли савдо дўкони сотувчиси томонидан харид чеки берилмаганлиги ҳақида солиқ идорасига мурожаат тушганлигини ва ушбу мурожаатни ижобий ҳал қилиб бериш эвазига 1 млн сўм талаб қилган. 2023 йил 26 май куни Когон шаҳар ДСИ биноси ёнида Т.A.дан талаб қилинган пулларни олаётган вақтда далилий ашёлар билан жиноят устида ушланган.
Мазкур ҳолат юзасидан фуқаро Б.С.га нисбатан Ўзбекистон Республикаси Жиноят Кодексининг 168-моддаси 1-қисми билан жиноят иши қўзғатилиб, дастлабки тергов ҳаракатлари олиб борилмоқда.