Бухорода соғлиқни сақлаш соҳасида фаолият олиб борувчи мансабдор шахс пора билан ушланди, дея хабар бермоқда ИИВ ахборот хизмати.
Қайд этилишича, республика тез тиббий ёрдам маркази Бухоро филиали мансабдори бир фуқарони ўзи раҳбарлик қилиб келаётган тиббиёт муассасасининг филиалларидан бирига ҳамшира вазифасига ишга қабул қилишни ваъда қилиб, эвазига тамагирлик йўли билан 300 АҚШ долларини пора тариқасида беришни талаб қилган.
16 май куни соат 14:50 ларда ҳуқуқ-тартибот органлари ходимлари томонидан ўтказилган тезкор тадбир давомида тиббиёт муассасаси раҳбари ўз хизмат хонасида кимёвий ишлов берилган 300 АҚШ долларини олаётган вақтида жиноят устида қўлга тушган.
Мазкур ҳолат юзасидан Жиноят Кодексининг 210-моддаси 1-қисми билан жиноят иши қўзғатилиб, ҳозирги кунда дастлабки тергов ҳаракатлари олиб борилмоқда.