Давлат функция-ваколатларини хусусий секторга ўтказиш тартиби белгиланди
Ҳукумат қарори билан давлат функцияларини хусусий секторга ўтказиш тартиби тўғрисидаги низом тасдиқланди. Бу ҳақида Маҳалла ва оилани қўллаб-қувватлаш вазирлиги ҳузуридаги “Маҳалла ва оила” илмий-тадқиқот институти хабар берди.
Унда айтилишича, Иқтисодий тараққиёт ва камбағалликни қисқартириш вазирлиги ваколатли орган ҳисобланиб, манфаатдор вазирлик ва идоралар билан биргаликда ҳар йили 15 февралгача давлат бошқарувидаги самарасиз ҳамда эксклюзив функцияларни тўлиқ хатловдан ўтказади. 20 мартгача аниқланган самарасиз давлат функцияларини хусусий секторга ўтказиш имкониятини таҳлил қилади.
Бундан ташқари, 20 майгача хусусий секторга ўтказиш имконияти мавжуд бўлган давлат функцияларининг иқтисодий самарадорлигини таҳлил қилади ҳамда хусусий секторга ўтказилиши таклиф этилаётган давлат функцияларининг якуний рўйхатини шакллантиради.
1 июлгача давлат функцияларига ўхшаш бўлган фаолиятга эга хусусий сектор субъектларининг дастлабки рўйхатини жамоатчилик муҳокамасидан ўтказиб, шакллантиради.
Шунингдек, 1 августгача хусусий секторга ўтказиш тавсия этилган давлат функциялари рўйхатини тузади ва тегишли хулосалар билан биргаликда Вазирлар Маҳкамасига киритади.
1 октябргача Ҳукумат томонидан маъқулланган давлат функцияларини хусусий секторга ўтказиш бўйича норматив-ҳуқуқий ҳужжат лойиҳасини ишлаб чиқади.
Юқорида белгиланган вазифалар ҳисоботи учун Давлат функцияларининг ягона рўйхатга олиш китобини шакллантириш ва юритиб боришга қаратилган электрон майдонча яратилади.
Давлат функциялари аутсорсинг, краудсорсинг, давлат ижтимоий буюртмаси, аккредитация, сертификатлаштириш ҳамда бошқа механизмларни қўллаган ҳолда хусусий секторга ўтказилади.
Эслатиб ўтамиз, бундан аввал ўз-ўзини тартибга солувчи ташкилотлар фаолияти қонунийлаштирилиши, ер участкаларини хусусий секторга мулк ҳуқуқи билан бериш тартиби кучга кириши ҳамда келгусида хусусий секторни таълим соҳасига жалб қилиш устувор вазифа сифатида қайд этилгани ҳақида хабар берилганди.
Оламгир Абдиев
