Диний олий таълим муассасаларига кириш имтиҳонлари санаси маълум бўлди
Ижодий имтиҳон ва тест синовлари 3—12 август кунлари ўтказилади.
Ўзбекистон мусулмонлари идораси тасарруфидаги олий диний таълим муассасаларида 2022-2023 ўқув йили бўйича қабул имтиҳонлари ижодий имтиҳон ва тест синови шаклида ўтказилиши белгиланган. Бу ҳақда Диний идоранинг Таълим ва илмий-тадқиқодлар бўлими хабар берди.
Ҳадис илми мактабига кириш имтиҳонлари 3 август куни Ҳадис илми мактаби биноси спорт залида бўлиб ўтади. Ҳадис ва мусталаҳ ал-ҳадис ва араб тилидан ижодий имтиҳонлар олинади. 4 август куни мазкур муассасанинг орқа ҳовли қисмида Ўзбекистон тарихи фанидан тест ўтказилади ва 5 августда мандат эълон қилинади.
Имом Бухорий номидаги Тошкент ислом институтига кириш имтиҳонлари 8 август куни Тошкент ислом институти биноси айвон қисмида бўлиб ўтади. Унда араб тилидан ижодий имтиҳон олинади. 9 август куни мазкур муассасанинг ҳовлисида Фиқҳ ва ақоиддан тест ўтказилади ва 10 августда мандат эълон қилинади.
Мир Араб олий мадрасасига кириш имтиҳонлари 11 август куни Мир Араб олий мадрасаси биноси айвон қисмида бўлиб ўтади. Унда араб тилидан ижодий имтиҳон олинади. 12 август куни ҳудди шу жойда Фиқҳ ва ақоиддан ҳамда Ўзбекистон тарихи фанидан тест ўтказилади. Мандат натижалари 13 августда эълон қилинади.
Эслатиб ўтамиз, Имом Бухорий номидаги Тошкент ислом институти, Мир Араб олий мадрасаси ва Ҳадис илми мактабига ўрта махсус ислом таълим муассасаларини тамомлаган абитуриентларнинг ҳужжатлари қабул қилинган.
Ўзбекистон мусулмонлари идораси тасарруфидаги Ўрта махсус ислом таълим муассасалари кириш тест синовлари Давлат тест маркази томонидан ўтказилади. 2022-2023 ўқув йили учун тест синовлари кунлари бўйича қўшимча маълумот берилади.
