Дунёдаги энг кекса аёл ҳужайраларида ёшартирувчи генлар топилди
Мариянинг генлари ҳужайраларини ўзини 17 йил ёш ҳис қилишга ёрдам берган.
Америкада туғилиб, умрининг катта қисмини Испанияда ўтказган дунёнинг энг кекса инсони – Мария Браняс Морера 117 ёшида вафот этди. Олимлар унинг организмини ўрганиш жараёнида ғайриоддий генетика сирларини кашф этишди.
Генетик тадқиқотлар шуни кўрсатдики, Мариянинг ирсий генлари ҳужайраларининг ёшини биологик ёши билан солиштирганда 17 йилга ёшроқ ҳис қилишига ёрдам берган. Бундан ташқари, унинг ичак микробиотаси янги туғилган чақалоқларникига ўхшаш бўлиб чиққан. Ушбу тадқиқот Барселона университети генетика профессори Манел Эстеллер бошчилигида олиб борилган.
Тадқиқотчиларнинг таъкидлашича, Мария Браняс умрининг охиригача ақл-идрокини сақлаб қолган. Унинг соғлиғига боғлиқ асосий муаммолар фақат бўғим оғриқлари ва эшитиш қобилиятининг йўқолиши билан чекланган.
Мария соғлом турмуш тарзига амал қилган:
У ҳар куни уч маҳал йогурт истеъмол қилган ва асосан ўсимлик маҳсулотларидан иборат бўлган ўртаер денгизи (средиземноморе) диетасига риоя қилган. Спиртли ичимлик ва тамакидан бутунлай тийилган. Сайр қилишни яхши кўрган ва доимо оиласи ҳамда яқинлари қуршовида бўлишга интилган.
Генетик тадқиқот натижалари келажакда қарилик билан боғлиқ касалликларни даволаш ва умрни узайтириш усулларини ишлаб чиқишда муҳим ўрин тутиши мумкин. Манел Эстеллер бошчилигидаги жамоанинг ушбу иши дунё бўйича 110 ёшдан ошган инсонларнинг умр сири бўйича энг батафсил ўрганилган тадқиқотлардан бири бўлди.
