Унинг ойдин орзулари, гўзал ниятлари бор эди. Лекин, минг афсуслар бўлсинки, бу орзу- ҳавас ва ниятларни қўшни йигит барбод қилди. Албатта, йигит жазосини олди, бироқ бу вақт орасида Камола айнан ундан фарзандли бўлди.
Аммо Камоланинг ҳаётидаги бу чигалликлар шу билан тугамади, аксинча улар янада чигаллашиб, бошқа муаммоларни ҳам юзага келтирди. Ангренлик Камолахон Болтаева бошина тушган савдоларни сўзлаб берди.
-Мен ўша йигит билан қўшни эдим. Биз севишдик. Менга совчи қўйди, аммо ота-онам бирор касбнинг бошини ушламаган, ҳеч қаерда ишламайди деб совчиларни қайтаришди. Биз у билан яширинча учрашишда давом этдик. Бу орада у ўғрилик қилиб қамалди. Бир ой ўтгач ҳомиладорлигимни билдим. Қизим ота- онам уйида туғилди. Болам 6 ойлик бўлганда мени бошқа бир эркакка турмушга узатишди. Қайнотам Ангрендан бир хонали уй олиб берди. Бирин -кетин фарзандларим туғилди. Ҳавас қилгудек оила эдик. Кутилмаганда турмуш ўртоғим бошқа ишга ўтди ва кунора ичиб келадиган одат чиқарди. Оёқда туролмайдиган даражада ичиб келиб уйда жанжал кўтарадиган бўлди. Бир куни тунда уйимизга Қодир деган йигит билан келиб боши кўп оғриётгани сабаб табибга кўриниб келиши учун Самарқандга уч кунда кетаётганини айтди. Орадан бир хафта ўтди, аммо эрим келмади. Кейин тунда маст ҳолда Қодир деган келиб гапи борлигини, эшикни очишимни айтди. Мен ишониб, эшикни очдим. Эшикни очганимни биламан у уйимга бостириб кирди. Эрим унга қиморда 200 доллар ютқазиб қўйганини, эвазига уй -жой, фарзандларим ва мени топширганини айтди. Аввалига ишонмадим. Кейин жанжал кўтардим ички ишлар ходимларини чақирдим. Онам келиб қизлик уйимга олиб кетди. Бир неча ойлардан кейин турмуш ўртоғим онамнинг уйига келди. Хамма нарса мастликда бўлганини айтиб кечириб сўради. Шунча вақт ичида қаерда юрганини сўраганимизда қиморда ютқазган қарзини тўлаш учун Россияга ишлагани кетганини айтди.
Эримни кечирдим, яна бирга яшашни давом эттирдим. Чунки иккинчи турмушим эди. Бундан ҳам ажрашсам одамлар айб ўзида экан деб гап -сўз қилишларидан қўрқдим. Фарзандим тўртта бўлди. Бир хонали уй торлик қилиб, 2 хонали уйга алиштиришга келишдик. Маклер топдик,уйни сотиб, пулини эримга бердим. Эвазига 2 хонали янги уй олдик ва кўчиб ўтдик. Икки кун ўтгач эрим топган маклер уйни биздан аввал бошқа одамга сотгани маълум бўлди. Бизни янги уйнинг ҳақиқий эгаси ҳайдаб чиқарди. Маклер аёл эса уй учун пул бермаганларинг учун уйни бошқа одамга сотдим, деди. Кетма -кет келган зарбалардан менда яшаш истаги сўна бошлади. Аммо болаларим учун ўзимни қўлга олишга ҳаракат қилдим.
Инобат Райимқулова, Ангрен шаҳар “Обод” МФЙ раиси ўринбосари:
Камола турмуш ўртоғи билан бир хоналик уйда яшади. Кейин 2 хонали уйга кўчиб ўтишди. Кейинроқ эри билан келишолмади ва онасиникига кетди. Орадан тўрт йил ўтиб яна қайтиб келди. Биз қўлдан келганча ёрдам бердик. Эри билан яраштиришга харакат қилдик. Лекин эри Бунёд бошқа аёл билан яшаётганини маълум қилди.
Биз ижодий жамоамиз билан Камоланинг турмуш ўртоғини топиш мақсадида маҳалла фаоллари берган манзил бўйича излаб Ангрен шаҳрига бордик. Бунёд Бўтаев ҳозирда бошқа аёл билан тинч яшаётганини, оиласига қайтмаслиги, ярашиш истаги йўқлигини билдирди.
-Камоланинг мен хақимда айтган 80 фоизи гапи ёлғон. Бир хонали уйни бирга сотдик. Пулни унинг қўлига берганман, ўзи йўқ қилди. Фарзандларим сарсон бўлди, бир қараса келиб менга ташлаб кетади, бир қараса ўзи билан олиб кетади. Доим жанжал қилиб ички ишлар ходимларини чақиради. Бу аёл нима хоҳлаётганини ўзи ҳам билмайди.
Ҳозирда мен ўзим бошланғич тўлов қилиб кредитга уй олдим. Янги оила қурдим ҳамма нарсани нолдан бошладим. Кредитни ўзим секин-аста тўлаяпман.
-Фарзандларингиз кимда?
Фарзандлар ота- онамнинг уйида эди. Яқинда Камола жанжал қилиб олиб кетди.Орада опам ҳам болаларимга қаради.
Бир хонали уйимиз сотилганда Камола пулни менга берганини айтибди. Бу гапи ёлғон, менга уйнинг пулини бермаган.
-Аёлингизни қиморга аёлизни тикканингиз ростми?
-Йўқ, мен аёлимни яхши кўрганман, ҳеч қачон бундай қилмаган бўлар эдим. Тунда келган эркак деб айтган йигит менинг шогирдим. У тунда келмаган, аксинча, кундузи келган. Уйдан, болаларимдан хабар ол деб, мен илтимос қилган эдим.
-Уч кунга Самарқандга бориб келаман деб уйдан чиқиб кетганингиз ростми?
-Бу ҳам ёлғон, Россияга кетишимни ҳамма биларди, фарзандларим билан хайрлашиб кетганман.
Россиядан келиб самарқандлик аёлга уйландим. Ахир, бошқа иложим ҳам йўқ эди. Фарзандларимни менга ташлаб кетди, уларга яхши қарашим учун аёл киши керак. Шу сабабли уйландим. Менда Камоланинг тилхати ҳам бор. Унда Камола 4 та фарзандни боқолмагани учун ташлаб кетаётгани айтилган.
Нодир Суюнова, қўшни аёл
Мен Бунёд ва Камолага қўшни бўлганман. Бунёд Россияга кетишидан олдин ҳамма билан хайрлашиб кетган. Камола ўзи уни кузатиб қўйгани ёдимда. Бунёд Россияга Камоланинг дадасини олдига кетган. Шу сабаб Камоланинг билмаслиги мумкин эмас эди. Камола болаларини Бунёдга ташлаб кетган. Шунда Бунёд бир ўзи болалар билан қийналиб қолган ва Умида исмли самарқандлик аёлга уйланган.
“Нима учун фарзандларингизни эрингизга ташлаб кетдингиз, нима учун Россияда эканлиги билмадим деб айтдингиз? Нега ёлғон гапирдингиз. Бу ёлғон гаплардан мақсад нима эди?”-деган саволар билан биз телефон орқали Камолга мурожаат қилдик. Аммо Камола жавоб беришни истамади.
Биз ижодий жамоамиз билан Камоланинг яқинларидан ҳам суриштирдик. Маълум бўлишича, Камола ва Бунёд ўзаро жанжаллардан сўнг қонуний ажрашишган. Камола эрини алиментга берган. Бу орада Бунёд алимент суммасини анча вақт тўламай юрган. Сўнг Камола яна қайта судга берган. Суд қарори асосида чиқариб берилган 2 миллион қарздорликни Бунёд тўлай олмаслиги айтиб, эвасига ўзаро келишув бўлган. Камола фарзандларини Бунёднинг опасига 2 милион сумнинг ўрнига қараб бериш шарти билан ташлаб, ўзи ҳам Россияга кетган.
Халқимизда бирни кўриб фикр қил, бирни кўриб шукур қил, деган нақл бор. Бугун бир оиланинг можаросини кўрсатдик, улар томонидан хақиқат деб айтилган гаплар бир- бирига зид. Бундай оилалар эса жамиятимизда афсуски, бор. Эркак оиланинг боши бўлиш керак. Бошни йўлса солиш эса аёл кишидан катта маҳорат талаб этилади. Бу маҳорат эса бу оиланинг на эркагида, на аёлида бор. Шу сабаб оила барбод бўлди. Ўртадаги тўрт нафар вояга етмаган болалар эса сарсон. Ота-она тирик бўла туриб болалар қариндошларининг қўлида яшаса, бу болалар учун энг катта азиятдир. Хулоса эса ўзингиздан.
Муножат Валиева