Фарғонада "аукцион" орқали арзон ер майдони олиб бераман деб 60 миллион сўмни қўлга киритган шахс ушланди
Алдов йўли билан 60 миллион сўмни қўлга киритган шахс устидан жиноят иши қўзғатилди.
Марғилон шаҳрида фуқарога "aукцион" савдосидан арзон ер майдони олиб беришини айтиб, алдов йўли билан 60 миллион сўмни қўлга киритган шахс устидан жиноят иши қўзғатилди. Бу ҳақда Фарғона вилояти ИИБ ахборот хизмати хабар берди.
Маълум қилинишича, Марғилон шаҳрида 18 октябрь куни фуқаро Д.Н. М.А.ни ишончига кириб, "aукцион" савдосидан арзон ер майдони олиб беришини айтиб, 60 миллион сўм олиб, берган ваъдасини бажармасдан қўлга киритган пулларни ўз эҳтиёжига сарфлаб юборган.
Мазкур ҳолат юзасидан Марғилон шаҳар ИИБ ҳузуридаги тергов бўлими томонидан Жиноят кодексининг 168-моддаси 2-қисми "а" банди (фирибгарлик) билан жиноят иши қўзғатилиб, тергов ҳаракатлари олиб борилмоқда.
Маълумот учун: ушбу жиноятни содир этган шахс беш йилгача озодликдан маҳрум қилиш билан жазоланиши мумкин.
Эслатиб ўтамиз, Бўстонлиқ туманида 5 гектар ерни 150 минг АҚШ долларга олиб беришни ваъда қилган шахс ушланганди.
Аввалроқ Жарқўрғон туманида захирадаги ерни сотмоқчи бўлган фирибгар ушлангани, 10 минг доллар эвазига уй-жой қуриш учун ер олиб бермоқчи бўлган шахс ушлангани, Бухорода ҳокимлик заxирасидаги ерни 8 000 долларга сотмоқчи бўлган фуқаро қўлга олингани ҳамда ДХХ томонидан ноқонуний ер сотиш ҳолатларининг олди олингани ҳақида хабар берилганди.
