Фарғона шаҳрида барпо этилиши режага қўйилган Экошаҳар ҳудудида “Янги Ўзбекистон” боғига кўчат ўтқазиш ишлари бошланади.
Вилоят ҳокими Хайрулло Бозоров, Фарғона шаҳрида барпо этиладиган Экошаҳар ҳудудида 70 гектар майдонда ташкил этилаётган “Янги Ўзбекистон” боғига кўчат ўтқазишга тайёргарлик жараёнлари билан танишди.
Унда шаҳар об-ҳавосини мўътадиллаштириш, ҳудудни сув билан таъминлаш мақсадида Экошаҳар ўртасидан оқиб ўтиши режалаштирилган канал қурилиши ишлари давом этмоқда. Бугунга қадар каналнинг 2 километрга яқин қисми якунланди.
“Янги Ўзбекистон” боғи таркибида каналнинг икки четидан пиёдалар йўлаги, велойўлаклар учун лойиҳада ажратилаётган масофа 4 метр бўлиши, бунда пиёдалар учун 2,5 метр, велойўлак учун 1,5 метр ажратилиши лойиҳага кикритилган. Шунингдек, ҳоким каштан, эман, липа, лола ва бошқа кўплаб турдаги манзарали дарахтлар жойлашувини белгилашда уларнинг хусусиятини ҳамда ҳисобга олиш зарурлигини таъкидлади.
Бундан кўзланган мақсад экотизимни шакллантириш, ландшафт меъморчилиги ва дизайни элементлари билан бойитилишдан иборат.
Жорий ҳафта якунига қадар “Янги Ўзбекистон” боғига кўчат ўтқазиш ишлари бошланиши белгиланди.
Эслатиб ўтамиз, аввалроқ Ўзбекистонда иккита миллий табиат боғи ташкил этилиши ва давлатимиз раҳбари Шавкат Мирзиёев "янги Тошкентни баҳаво жойда бунёд этамиз", - дея таъкидлаганди. Шунингдек, Сўғдиёна маҳалласининг Жалоир кўчасида, салкам 1 км масофада “бродвей” барпо қилиниши ҳақида хабар берилганди.
Чўлпоной Аҳмедова