"Бавария" ва "Барселона" Чемпионлар лигаси 3-турининг асосий учрашувларидан бири ҳисобланади. Жамоалар ўзаро умумий тарихга эга. Ханс-Дитер Флик бир неча йил олдин "Бавария" бош мураббийи сифатида "Барса"ни йирик ҳисобда мағлуб этганди. Мюнхен клуби билан у икки марта Бундеслига, Чемпионлар Лигаси, Германия кубоги ва Германия Суперкубоги, шунингдек, УЭФА Суперкубоги ва Клублар ўртасидаги жаҳон чемпионатини қўлга киритган. Аммо 2020/2021 йилги мавсум охирида Флик "Бавария"ни тарк этди. Жамоадан нима сабабдан кетгани ҳозиргача мавҳумлигича қолмоқда.
2020/2021 йилги мавсумда "Бавария" Бундеслигада ғолиб чиқди, аммо Германия кубогининг дастлабки босқичида ва Чемпионлар лигасининг чорак финалида муваффақиятсизликка учради. 2021 йил апрель ойида эса Флик Мюнхен клубини тарк этишини эълон қилди. Ўшанда мураббий қуйидаги фикрларни билдириб ўтган эди:
“Мен шартномани бекор қилмоқчиман. Сабаби ҳақида тўхталиб ўтмоқчи эмасман. Барча бошқарув ходимлари ҳам «Бавария»нинг катта ютуқларга эришишини хоҳламайди. Бу ҳақда ўзим жамоага айтишим керак эди, чунки миш-мишлар аллақачон тарқалиб кетган. Менинг келажагим ҳақида ҳамма нарса аниқ эмас. Терма жамоада ишлашни муҳокама қилмадик. Албатта, ҳар қандай мураббий Германия терма жамоасига устозлик қилиш ҳақида ўйлайди, лекин аввало мен яхшилаб ўйлаб кўришим керак. Сўнгги ҳафталар мен учун осон бўлмади".
Клуб Фликнинг кетишининг асл сабабини яширди. "Бавария" ичидаги вазият сирли эди. Флик "Бавария"нинг ўша пайтдаги спорт директори Ҳасан Салиҳамиджич билан бўлган можарога шунчаки чидай олмади. Менежер билан ёмон муносабатлар Ханс-Дитернинг қарорига асосий сабаб бўлди. Муаммолар 2019 йил декабрь ойида бошланган. Кейин Флик "Бавария"нинг келажакдаги трансфер кампаниясини танқид қилди ва клуб ичидаги одамлар унга тўсқинлик қилаётганини айтди. Салиҳамиджич эса унга қўнғироқ қилиб мураббийни "маркетинг ва менежмент ҳақида ҳеч нарсани билмайдиган одам" деб атаган. Кейинчалик Флик март ойида барибир раҳбариятдан трансферларни амалга ошириш ҳуқуқини талаб қилди. Бироқ, раҳбарият мураббийнинг илтимосини рад этди. Салиҳамиджич ва Флик ўртасидаги зиддият янада кучайди. "Бавария" раҳбари Оливер Кан эса можарони бостиришга ҳаракат қилди. Ханс-Дитер кейинчалик раҳбарият билан трансферларга таъсир қилиш масаласини бир неча бор муҳокама қилган. 2021 йилнинг февраль ойида спорт директори ва мураббий бутун жамоа олдида жанжаллашган. Франкфуртнинг "Айнтрахт" клубига қарши ўйин арафасида Флик автобусда Салиҳамиджичга бақирган. Сабаби кўп сонли футболчиларнинг жароҳати клубда катта йўқотишларга олиб келганди. Кейинчалик Флик спорт директоридан кечирим сўраганини таъкидлади. Аммо, бу вазиятдан кейин муносабатлар яхшиланмагани маълум қилинган.
Яна бир диққатга сазовор эпизод - 2020 йил ёзги трансферлар. "Бавария" кимларни сотиб олди? Асосий харид “Манчестер Сити” вингери Лерой Сане. Аммо мюнхенликлар таркибида Марк Рока, Буна Сарр, Дуглас Коста ва Эрик Чоупо-Мотинг ҳам бор эди. Бу Чемпионлар лигаси фаворити учун етарли эмас эди. Кейин Флик жамоанинг умумий савияси пасайганини таъкидлади. Ханс-Дитер ҳар бир трансфер ҳақида Салиҳамиджич билан бирга фикрлашганини таъкидлади. Бироқ, мураббийнинг таклифлари муваффақиятсизликка учради. Флик Салиҳамиджични трансферлар учун ошкора танқид қилмади ва дипломатик йўл тутди. Аммо, Жером Боатенг билан шартномани узайтириш билан боғлиқ вазият бунга имкон бермади. Мураббийга ҳимоячи керак эди. Ханс-Дитер бошлиқлардан футболчи билан янги шартнома имзолашни талаб қилди. Боатенгнинг ўзи ҳам "Бавария"да қолишни режалаштирганди. Бироқ, Салиҳамиджич ёши ва жароҳати боис Жером билан янги шартнома имзоламасликка қарор қилди. Боатенгнинг кетиши ҳақидаги гап-сўзлар "ПСЖ" билан Чемпионлар лигасининг чорак финал ўйинларидан олдин бошланганди.
"Мен учун "Бавария"ни эркин бошқариш ҳақида ўйлардим. Клуб ва масъул шахслардан - Карл-Хайнтс Румменигге, Ули Хёнес, Герберт Хайнердан миннатдорман. Улар менга бу жамоанинг бош мураббийи бўлишим ва улар билан муваффақиятга эришишимга ишонч беришди", - деганди Флик сўнгги баёнотида. У Салиҳамиджич ҳақида фикр билдирмаган.
"Бавария" ҳужумчиси Томас Мюллер мураббий футболчиларга айнан нима учун клубни тарк этаётганини тушунтирмаганини таъкидлаган: "У биздан ҳеч нарса қарздор эмас. Флик жуда қизғин бир ярим йил давомида жамоага жуда кўп нарса қолдирди. "Бавария" мураббийи кучли бўлиши керак. Бу у учун қийин вақт эди. Мураббий бизга ўз қарорини тушунтирмади". Охир-оқибат Флик Германия терма жамоасига бош мураббий этиб тайинланди. "Бавария"ни эса Юлиан Нагелсманн бошқарди, Салиҳамиджич эса Мюнхенда яна икки йил ишлади. 2023 йилнинг май ойида босниялик мутахассис ишдан бўшатилди. У мураббийлар билан кўп сонли можароларда (у Нагелсманн билан ҳам яхши ишламаган) ва муваффақиятсиз трансферларда айбланган.
