Рақамли технологиялар вазири Шерзод Шерматов ва Google компаниясининг давлат органлари билан ҳамкорлик ва оммавий сиёсат бошқармаси бошлиғи Олга Скороходова ўртасида учрашув бўлиб ўтди. Бу ҳақда вазирлик ахборот хизмати хабар берди.
Маълум қилинишича, учрашув аввалида меҳмонларга IT-Park фаолияти, резидентлар учун яратиб берилган шароитлар, хорижий компаниялар учун имкониятлар бўйича маълумотлар берилган. Шундан сўнг Ўзбекистон IT ва BPO соҳаларини янада ривожлантириш ҳамда кадрлар салоҳиятини ошириш масалаларига эътибор қаратилди.
Шунингдек, томонлар АКТ соҳасидаги иш ўринлари, ваколатлар ва таълим йўналишида ҳамкорлик бўйича ҳам фикр алмашишди.
Бундан ташқари, тажриба алмашиш ва малакали мутахассислар сонини кўпайтириш мақсадида Google ва Ўзбекистоннинг асосий IT-компаниялари ўртасида ҳамкорликни йўлга қўйиш масалалари ҳам муҳокама қилинди.