Грузия президенти Михаил Саакашвилини афв этиш бўйича ўз қарорини айтди
Бу ҳақда у миллатга телемурожаат пайтида маълум қилган.
Грузия президенти Саломе Зурабишвили ҳеч қачон Михаил Саакашвилини афв қилмаслигини маълум қилди.
"Собиқ президентнинг афв қилиниши бўйича менинг позициям аниқ — йўқ ва ҳеч қачон. Бу масалага бошқа қайтмайман", — деган Грузия раҳбари.
Шунингдек, у собиқ ҳамкасбини сиёсий маҳбус деб ҳисобламаслигини қайд этди.
"Собиқ президент сиёсий маҳбус бўлиш учун талаб этиладиган шартларга мос эмас. У мамлакатга ўз хоҳиши билан ва ноқонуний қайтиб келди. Саакашвилининг мақсади вазиятни беқарорлаштириш эди", — деб қўшимча қилган Зурабишвили.
Шу билан бирга президент Адлия вазирлигидан Саакашвилини алоҳида маҳбус сифатида кўрилишини сўраган ва унинг саломатлигини доимий назорат қилиб туришга топшириқ берган. Зурабишвилининг фикрича, собиқ президент соғлиғи ёмонлашувидан турли сиёсий кучлар мамлакатдаги вазиятни беқарорлаштириш мақсадида фойдаланиши мумкин.
Бундан аввал Саакашвилини судда ҳимоя қилиш учун Украина ва АҚШдан ҳам адвокатлар жалб қилиниши ҳамда унинг қамоқхонада кунига уч литр лимонад ичиши хабар қилинганди.
Жаҳонгир Қўзиев
