Илҳом Алиев Абдулла Арипов бошчилигидаги Ўзбекистон делегациясини қабул қилди

 

Озарбайжон президенти Илҳом Алиев 19 июль куни Бокуда Ўзбекистон бош вазири Абдулла Арипов бошчилигидаги ҳукумат делегациясини қабул қилди.

 

Суҳбат аввалида Ўзбекистон Бош вазири Озарбайжон президенти Илҳом Алиевга Шавкат Мирзиёевнинг саломи ва эзгу тилакларини етказди.

 

Ўз навбатида, Озарбайжон раҳбари мамлакат етакчисини ва бутун халқни президент сайловидаги ишончли ғалабаси билан яна бир бор табриклаб, Ўзбекистон халқига тинчлик-осойишталик, фаровонлик ва равнақ тилади.

 

Шунингдек, Ўзбекистон бош вазири мамлакатда бўлиб ўтган сайловдан сўнг Шавкат Мирзиёевни биринчи бўлиб президент Илҳом Aлиев табриклаганини билдириб, бу давлат раҳбарлари ва мамлакатлар ўртасидаги дўстлик ва қардошлик намунаси эканини таъкидлади.