Ис газидан заҳарланиб, вафот этган 5 нафар талаба иши бўйича ижара уй эгасига суд ҳукми ўқилди
Жорий йилнинг 27 февраль санасида вилоятдан пойтахтга ўқишга келган беш нафар талабанинг мурдаси улар ижарада турган уйдан топилгани ҳақидаги воқеа кенг жамоатчилик томонидан кўплаб мулоҳазаларга сабаб бўлганди.
Куни кеча мазкур ҳолат юзасидан Жиноят ишлари бўйича Юнусобод туман судида уй эгасига нисбатан жиноят иши кўриб чиқилди.
Судланувчи аёл олти нафар талаба билан қонуний ижара шартномаси тузмай, уйининг бир қисмини вақтинча талабаларга яшаш учун ажратган. Шу куни “Ҳудудгаз пойтахт” МЧЖнинг туман филиали ходимлари ушбу уйнинг ертўласидаги иситиш печи текширилганда, унинг ўрнатилган жойи техника хавфсизлиги қоидаларига зид экани аниқланган. Шунга қарамай аёл ижарада яшовчи талабаларга газ идораси ходими билан телефон орқали гаплашиб, ундан оғзаки равишда рухсат олганини айтган. Шундан сўнг ижарачи талабаларга иситиш печи ёнганда газ ҳиди чиқадиган носоз дудбўронни созлаб олишлари учун рухсат берган. Талабалар эса иситиш печини созлаб, уйнинг хоналарини иситиб, ишлатиб келган.
Уй эгасининг Вазирлар Маҳкамасининг “Электр энергияси ва табиий газдан фойдаланиш тартибини такомиллаштиришга доир қўшимча чора-тадбирлар тўғрисида”ги 22-сонли Қарори билан тасдиқланган 2-иловаси, 139-қисмининг бир қанча бандлари қоидаларини менсимаганлиги оқибатида ижарада яшовчи 5 нафар ижарачининг мурдалари номаълум этиологик моддадан заҳарланиш ташхиси билан топилган.
Ижарачи аёл Жиноят кодексининг 102-моддаси 2-қисми билан айбдор деб топилиб, 3 йил муддатга озодликни чеклаш жазоси тайинланди.
Муножат Валиева
