Жарималардан 8 миллион қарзи бор фуқаро қўшнисининг автомобилини ўғирлаб кетди
Шайхонтоҳур тумани Ички ишлар органи фаолиятини мувофиқлаштириш бошқармаси ҳузуридаги навбатчилик қисмига фуқаро Б.О.томонидан “Laсetti” русумли, давлат рақами 01 Z 466 ZA бўлган автотранспорт воситасининг номаълум шахс томонидан ўғирлаб кетилгани юзасидан хабар келиб тушган.
Олиб борилган тезкор тадбирлар давомида автомашина пойтахт кўчаларида давлат рақами ечилган ҳолда топилган.
Автомобиль кўздан кечирилганда, ичидаги овоз кучайтиргич, видеорегистратор ва 500 минг сўм ўғирлаб кетилгани аниқланган. Тезкор тадбир давомида жиноят содир этган шахс жабрланувчига бегона эмаслиги, балки унинг ён қўшниси экани маълум бўлди.
Фуқародан нега бу жиноятга қўл ургани ҳақида сўралганда, жаримадан қарзлари кўплигини баҳона қилди. Шунингдек, у шахсий машинаси жарима майдонида экани, уни олиб чиқиш учун эса 8 миллион кераклигини айтган.
— Грижам бор, белим оғрийди. Автомобиль ўриндиғини охиригача ётқизиб ҳайдайман. Ремень тақмайман. Шу сабаб, ҳар доим жаримага тортиламан. Олган жарималаримнинг 90 фоизи шу — ремень тақмаганим учун берилган. Машинам талони ҳам белгиланган вақтидан ўтиб кетгани учун жарима майдонига киритилган, — дейди у.
З.А.га нисбатан Жиноят кодексининг 267-моддаси 1-қисми билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Аввалроқ Тошкентда автомобиль шиналари ўрнига ғишт қўйиб кетаётган ўғирилар қўлга тушгани ҳақида хабар берган эдик.
Муножат Валиева
