Аxios нашрининг хабар беришича, АҚШнинг собиқ вице-президенти Камала Харрис 2028 йилда бўлиб ўтадиган президентлик сайловларида иштирок этиш имкониятини кўриб чиқмоқда ва ушбу йўналишда дастлабки сиёсий фаолликни бошлаган.
Нашр маълумотларига кўра, Камала Харрис ўтган ҳафта Лос-Анжелес шаҳрида Демократик Миллий Қўмита тадбирида нутқ сўзлаган. Унда у Демократлар ва Республикачилар партияларини танқид қилиб, уларнинг аҳолининг долзарб эҳтиёжларига етарли даражада жавоб бера олмаётганини таъкидлаган. Демократик партия вакиллари мазкур чиқишни Харриснинг эҳтимолий президентлик кампаниясига тайёргарлик босқичи сифатида баҳоламоқда.
Шунингдек, Харрис “107 кун” номи остидаги сиёсий сафарларини кенгайтириб, Жанубий Каролина штати ҳамда афро-америкалик аҳоли улуши юқори бўлган шаҳарларда чиқишлар қилган. У қора танли сайловчилар орасида кучли сиёсий қўллаб-қувватловга эга экани билан танилган бўлиб, бу омил Демократик партиянинг дастлабки сайловларида муҳим аҳамият касб этади.
Аввалроқ, Камала Харрис 2024 йилги президентлик сайловларидаги мағлубиятдан сўнг ҳам сиёсий фаолиятини давом эттириш ниятида экани ҳақида хабарлар тарқалган эди.