Жанубий Корея Миллий разведка хизмати (NIS) маълумотларига кўра, Шимолий Корея етакчиси Ким Чен Ин ўз қизи Ким Жу-эни мамлакат бошқарувига ворис сифатида тайёрлаётгани тахмин қилинмоқда.
Yonhap ахборот агентлиги хабарига кўра, Ким Жу-э сўнгги вақтларда Армия куни тадбирлари, шунингдек, Кумсусан Қуёш саройига ташриф каби муҳим давлат маросимларида мунтазам иштирок этмоқда. Шунингдек, у айрим сиёсий масалаларни муҳокама қилиш жараёнларида ҳам қатнашаётгани қайд этилган.
Қайд этилишича, аввал NIS Ким Жу-э бўйича “ворисни тайёрлаш” атамасидан фойдаланган бўлса, ҳозирда “ворисни тайинлаш босқичи” иборасидан фойдаланмоқда.
Разведка маълумотларига кўра, Ким Жу-э тахминан 2013 йилда туғилган. Шунингдек, Ким Чен Ин оиласида яна фарзандлар борлиги ҳам айтилмоқда.
Шу билан бирга, айрим мутахассислар Шимолий Кореяда мавжуд қатъий сиёсий бошқарув тизими, Ким Чен Иннинг нисбатан ёш экани ва соғлиғи билан боғлиқ жиддий муаммолар йўқлигини ҳисобга олиб, ворислик масаласида якуний хулосага келиш ҳали эрта эканини таъкидламоқда.